Rayon Sports ntikiri mukeba wa APR FC – Mugiraneza Jean Batiste Miggy

Yanditswe na Rwanda Football ku wa 05.02.2019 saa 12:34

Kapiteni wa APR FC,Mugiraneza Jean Baptiste yatangaje ko Rayon Sports itakiri mukeba wa APR FC ahubwo babigaranzuye ku buryo bukomeye.

Mu kiganiro yagiranye na X Large TV ikorera kuri You Tube, Migi yagiriye inama ubuyobozi bwayo kongera imbaraga kugira ngo bongere guhangane,kuko muri iyi minsi yemeza ko yasubiye inyuma. Yavuze muri iyi minsi Rayon Sports yabaye insina ngufi kuri APR FC ndetse bayigaranzuye cyane,asaba abayobozi bayo kongera kugarura ihangana.

Mugiraneza Jean Baptiste Migi

Yagize ati “Mu bihe byahise APR FC na Rayon Sports zari ikipe zagoranaga cyane kuko nta kipe yatsindaga indi kabiri.Uyu munsi twarazaga Rayon Sports ikadutsinda ejo tukaza dukubita agatoki ku kandi tukayitsinda.Muri iyi minsi tutabeshyanyije APR imaze kwerekana ko ari ubukombe hano kuko ngira ngo nkanjye aho mviriye muri Kenya ngarutse muri APR FC mu mikino irindwi duheruka gukina twayitsinze itandatu idutsinda umwe.Ntabwo bikiri ubukeba ahubwo hari ikipe yigaranzuye indi iyereka ko iyiri hejuru.

Birasaba izindi mbaraga zirenze kugira ngo ikipe ya Rayon Sports yitegure cyane natwe nka APR FC ntitwirare kugira ngo ka gahigo tutagatakaza,dukomeze tuyitsinde. Baturimo ideni bafite akazi gakomeye kugira ngo baritwishyure.Twebwe nka APR FC,ushobora gutsindwa n’indi kipe yose ariko gutsindwa na Rayon Sports ni ikosa rikomeye.”

Migi yatangaje ko yishimira ko mu mikino itanu aheruka gukina na Rayon Sports ari kapiteni wa APR FC yose bayitsinze ndetse biteguye gukomeza kuyitsinda.  APR FC iherutse gutsinda Rayon Sports igitego 1-0 ku mukino w’umunsi wa nyuma w’igikombe cy’Amahoro ndetse iragitwara.

Tanga igitekerezo