Rayon Sports: Kambale Salita Gentil yongeye kugaragara

Yanditswe na Admin ku wa 30.10.2014 saa 14:19 | Yasuwe : 1,314

Ubwo Rayon Sports yasuraga Etincelles i Rubavu, rutahizamu wayo Kambale Salita Gentil waburiwe irengero nyuma ya CECAFA yongeye kuboneka avuga ko ari kwishyuza Rayon Sports miliyoni ebyiri naho ubuyobozi bw’iyi kipe y’i Nyanza bwo buvuga ko bwamutumye ibyangombwa.

Aganira n’ IGIHE, Kambale yabanje kuvuga ko nyuma ya CECAFA yagiye muri Congo gusura umuryango we, abajijwe impamvu yasibye iminsi ine ibanza ya shampiyona avuga ko hari ibibazo afitanye na Rayon Sports.

Kambale yagize ati“Impamvu nyuma ya CECAFA, ntagiye i Nyanza mfitanye ikibazo na Rayon Sports ntibarampa miliyoni 2 Rwf [recrutement] bari bambwiye ko bazayampa nyuma ya CECAFA ntibubahirije amasezerano, niyo mpamvu nagiye.”

kambale

Uyu wamenyekanye nka Pappy Kamanzi yavuze ko yaje kuri Stade Umuganda kwirebera uyu mukino ariko abayobozi ba Rayon Sports nibashaka kuvugana yiteguye kumvikana nabo mu gihe kuri iki Cyumweru bakina na mukeba, APR FC.

Nyamara Ntampaka Theogene, Umuyobozi wa Rayon Sports, ntiyahakanye cyangwa ngo yemeze niba hari amafaranga bafitiye Kambale, avuga ko niyo yaba ahari batari kumusanga iwabo batanahazi.

Yagize ati“Kambale twamusabye kuzana ibyangombwa byuzuye by’ikipe yavuyemo muri Congo kuko dushaka kwirinda bimwe mu bibazo twari tumazemo iminsi, ntiyagaruka.”

Hari amakuru avuga ko uyu mukinnyi yaba yabonanye n’abayobozi ba Rayon Sports iri gutegura umukino wa APR FC ku Cyumweru kuri stade Amahoro nubwo nta myanzuro yafashwe yamenyekanye.

Kambale yavugaga ko nyuma y’umukino ahita yitahira mu gihe amakuru atugeraho myugariro wa Rayon Sports, Serugendo Arafat ari gukinira Rennaissance y’i Kinshasa.

Rayon Sports ishobora kudakinisha Majyambere Alipe na Bizimana Djihad bari mu bizamini bya Leta, Tubane James urwaye amaso na Hategekimana Aphrodis “Kanombe” utakinnye na Etincelles.

APR FC nayo ishobora kudakinisha Bayisenge Emery, Rusheshangoga Michel, Mukunzi Yannick na Iradukunda Bertrand bari mu bizamini mu gihe Buteera Andrew na Tibingana Charles batarabona ibyangombwa.

Tanga igitekerezo na Facebook

Tanga igitekerezo