Rayon Sports iyoboye urutonde nyuma y’umunsi wa kane

Umunsi wa kane wa  shampiyona kuri uyu wa gatatu waranzwe n’igaruka rya Rayon Sports ku mwanya wa mbere nyuma yo gutsinda Etincelles ibitego 3-2 mu mukino wabereye kuri Sitade Umuganda ku Gisenyi.

Rayon Sports yari yakaniye uno mukino yagombaga gutsinda kugirango izahure na mukeba APR FC kuri icyi cyumweru  kuri Stade Amahoro zose zinganya amanota .

Ibitego bya Rayon Sports byatsinzwe na Leon Uwambazimana, Sibomana Abouba Bakari na Jean Paul Havugarurema Raro, mu gihe Jean Bosco Harorimana yatsinze ibitego bibiri bya Etincelles.

Rayon Sports yahise ifata umwanya wa mbere n’amanota 10, ikaba irusha APR umubare w’igiteranyo w’ibitego bimaze gutsindwa. Rayon Sports izigamye ibitego 7 mu gihe APR FC izigamye ibitego 3.

abafana

Abafana ba Rayon Sports baraye neza mbere yo guhura na mukeba APR kuri icyi cyumweru 

Mu yindi mikino yabaye kuri uyu wa gatatu, Isonga yanganyije na Gicumbi ibitego 2-2 kuri Sitade ya Kigali naho Musanze na Espoir zanganyije 0-0.

Mu mikino yindi y’umunsi wa kane yabaye kuwa kabiri; APR yanganyije igitego 1-1 na Marines I Rubavu. Haruna Muvunyi yatsindiye Marines igitego ku munota wa 6 hanyuma Mugiraneza Jean Baptista aza kukishyura ku munota wa 86.

Police FC ku Kicukiro yaguye miswi na AS Kigali, umukino wa kabiri ukurikirana iyi kipe y’abashinzwe umutekano inganyije nyuma ya Sunrise nayo yanganyije na Mukura VS igitego 1-1 ibona inota rya mbere ku munsi wa kane wa shampiyona.

I Nyamagabe, umutoza Bizimana Abdul akomeje kwihagararaho ku isezerano ryo kudatsindirwa mu rugo, nyuma ya Espoir yatsinze na Kiyovu Sports igitego 1-0.

Uko imikino y’Umunsi wa Kane Yarangiye:

Kuwa Kabiri

Marines FC 1-1 APR FC

Police FC 0-0 AS Kigali

Mukura VS 1-1 Sunrise FC

Amagaju FC 1-0 SC Kiyovu

Kuwa Gatatu

Isonga FC 2-2 Gicumbi FC

Musanze FC 0-0 Espoir FC

Etincelles 2-3 Rayon Sports

Tanga igitekerezo na Facebook

Tanga igitekerezo