Rayon Sports irashaka kugarura Amissi Cedric

Yanditswe na Admin ku wa 02.06.2015 saa 14:42 | Yasuwe : 1,315

Ubuyobozi bwa Rayon Sports ntiburumvikana n’umukinnyi Amissi Cedric wayikiniye kuri ubu akaba akina muri Chibuto Fc muri Mozambique, bukaba bwaraboneyeho n’umwanya wo guhakana ko hari ibiganiro bagiranye na Lionel Saint Preux.

Umuvugizi wa Rayon sports Fc Niyomusabye Aimé Emmanuel, agaruka ku makuru yari amaze iminsi atangazwa yavuze ko basa n’abamaze kumvikana na Amissi Cedric wahoze abakinira ariko ku bijyanye na Lionel Saint Preux we nta biganiro bigeze bagirana.

amissi-cedric

Yagize ati :”Amissi Cedric we turaganira kandi arashaka kugaruka muri Rayon gusa twategereza akabanza akarangiza amasezerano mu Gushyingo 2015 tukabona kumugura wenda ubwo yatangira kudukinira muri Mutarama 2016 mu gihe twaba twumvikanye, Lionel St Preux we ibivugwa ko turi mu biganiro ni ibihuha kuko nta muntu n’umwe wo muri komite umuvugisha kereka niba ari abafana bamuvugisha bisanzwe ndetse nta n’ubwo ari muri gahunda y’abakinnyi duteganya kongera mu ikipe.”

Niyomusabye avuga ko usibye Amissi Cedric baganiriye, hari n’abandi bakinnyi babiri bashaka b’abanyamahanga ndetse batangiye kuvugana nabo, ariko bakaba bataratangaza amazina yabo, umwe akomoka i Burundi undi muri Uganda.

Yagize “hari abakinnyi umutoza Kayiranga Baptiste yatubwiye ko yashimye, harimo umurundi n’umugande, niwe uri kuvugana nabo kandi niwe uzi amazina yabo, dutegereje ko bagira icyo bumvikana ubundi tukabaha amafaranga bagasinya.”

Kayiranga utoza Rayon we  yavuze ko ibijyanye n’abakinnyi azagura ubu atarabitangaza gusa ntiyahakana ko hari abakinnyi ashaka hanze y’u Rwanda.

Tanga igitekerezo na Facebook

Tanga igitekerezo