Rayon Sports ikomeje gutsitara, Apr iracyari iya mbere

Yanditswe na Rwanda Football ku wa 12.01.2015 saa 10:22 | Yasuwe : 910

Kuri icyi cyumweru Rayon Sports irangije imikino y’igice cya mbere  cya shampiyona inganya  na Mukura VS 0-0mu mukino w’umunsi wa 13 wabereye kuri Sitade Amahoro.

Uyu mukino nawo wari utegrejwe n’abakunzi benshi bibwiraga ko ikipe yabo bakunda igiye ku batsindira Mukura ikabagarurira icyizere.

Mu mikino cumi n’itatu (13) ya shamiyona igice cya mbere imaze gukina, Rayon Sports yanganyije irindwi (7), itsinda itanu(5)  itsindwa ibiri(2). Iyi kipe y’Inyanza ubu iri ku mwanya wa gatanu n’amanota 21.

Umutoza  Andy Mfutila wari ufite abakinnyi be bose yatangiye akinisha abakinnyi bane inyuma, batatu hagati na batatu imbere. Umukinnyi Robert Ndatimana wari uri mu basimbura  ku mukino Rayon Sports yanganyijemo  na Police yari yabanje mu kibuga kuri uyu mukino. Abouba Sibomana nawe wari ufite uburwayi mu mikino iheruka yabanje ku ntebe y’abasimbura.

Mu gice cya mbere Rayon Sports yasatiraga Mukura cyane iciye ku ruhande rw’iburyo. Umunyezamu wa Mukura Shyaka Regis yahuye n’akazi katoroshye ko gukuramo imipira ya Kapiteni  Ndayisenga Fuadi mu gihe rutahizamu Sina Jerome ukibazwaho byinshi n’abafana we imipira myinshi yayitereraga hanze.

rayonmukura15

Abo hagati ba Rayon Sports Ndatimana Robert  na Bizimana  Djihad bitwaye neza cyane bigaragara ko barushaga   abo ku ruhande rwa Mukura Hakizimana Muajili na Gakuru Jean Claude.

Mukura VS ntiyabonye uburyo bwinshi ariko Akim Zacky yahushije igitego cyabazwe ku mupira yari ahawe na Kapiteni Cyiza Hussein wateje ibibazo cyane mu b’inyuma ba Rayon Sports mu mukino wose.

Rayon Sports nayo yaje kubona uburyo bwo gutsinda nyuma yaho Fuadi Ndayisenga ahaye umupira mwiza Sina Jerome ariko umunyezamu wa Mukura awuvanamo , amakipe yombi ajya kuruhuka anganya 0-0.

Mu gice cya kabiri, amakipe yakomeje gukinira hagati ariko n’amahirwe yagiye aboneka ku mpande zombi nta kipe yabashije kuyabyaza umusaruro.

Kunganya kwa Rayon Sports bitumye iguma inyuma ya APR Fc bihora bihanganye mu rugamba rwo kwegukana igikombe cya Shampiyona n’icyinyuranyo cy’amanota 11. Mukura VS irangije igice cya shampiyona iri ku mwanya wa 11 n’amanota 14.

Mu yindi mikino Kuri Sitade ya Kicukiro Police yihanangirije ikipe ta Espoir iyitsinda ibitego 4-1. Ibitego byatsinzwe na Kipson Athuire, Ildebrand Nshuti, Innocent Habyarimana na Jacques Tuyisenge. Igitego cya Espoir cyatsinzwe na Deo Nibagwire.

I Nyamagabe, ikipe ya Amagaju yatsinze Etincelles igitego 1-0 gitsinzwe na Bosco Gasana Bosco naho Isonga inyanya na Musanze 0-0 ku kibuga cya Ferwafa I Remera.

APR Fc niyo iyoboye urutonde rwa shampiyona n’amanota 32 mu mikino 13 imaze gukinwa. AS Kigali iza ku mwanya wa kabiri n’amanota 27. Etincelles hamwe n’ikipe y’Isonga nizo ziri mu myanya yanyuma n’amanota 8, 4.

Abakinnyi babanjemo :

Rayon Sports : Jean Luc Ndayishimiye, Nizigiyimana Karim, Dushime Emmanuel (Sibomana Abuba), Manzi Hubert Sincère, Tubane James, Bizimana Djihad, Robert Ndatimana, Uwambajimana Leon( Laro), Peter Otema( Franck Lomami), Sina Jerome na Fuwadi Ndayisenga.

Umutoza : Andy Mfutila

Mukura VS : Shyaka Regis, Kwizera Yves, Celestin Ndayishimiye, Shyaka Philbert, Habimana Hussein, Zagabe Jean Claude, Gakuru Jean Claude, Hakizimana Muajili, Amani Mugisho Mukeshe, Cyiza Hussein na Akim Zacky (Nicolas Mahoro).

Umutoza : Okoko Godefoy

Urutonde rw’Agateganyo rwa ‘Phase Aller’:

1 APR
2 AS KIGALI
3 POLICE
4 RAYON S
5 AMAGAJU
6 MARINES
7 GICUMBI 13
8 SUN RISE
9 SC KIYOVU
10 ESPOIR
11 MUKURA VS
12 MUSANZE
13 ETINCELLES

Tanga igitekerezo na Facebook

Tanga igitekerezo