Rayon Sports FC ifite umutoza mushya

Yanditswe na Rwanda Football ku wa 30.06.2014 saa 07:25 | Yasuwe : 2,195

Kuri icyi cyumweru taliki ya 29.06.2014 nibwo ubuyobozi bwa Rayon Sports bwatangaje ko bwemeje ko Jean Francois Losciuto ukomoka mu gihugu cy’Ububiligi ariwe mutoza mushya mukuru .

Losciuto yatoranyijwe mu bandi batoza babiri aribo David Giguet (u Bufaransa) na Srdjan Zivonjic (Seribiya) hagendewe ku bigwi n’ubunararibonye, akaba ategerejwe mu Rwanda mu cyumweru gitaha agasinya amasezerano.

Ni ku nshuro ya kabiri agiye gukorera muri Afurika, nyuma yo gutoza Anges FC de Notsè yo muri Togo kuva muri Mutarama 2014.

Uyu mutoza afite inshingano zo gutangira gutoza abaknnyi bitegura CECAFA Kagame cup izabera i Kigali kuva tariki ya 9-23 Nyakanga 2014.

Jean-Francois-Losciuto

Umuyobozi wa Rayon Sports Ntampaka Theogene avuga ko bamaze kumenyesha uyu mutoza no kumwoherereza ubutumire, bakaba bamutegereje mu cyumweru gitaha mu Rwanda no gusinya amasezerano.

Muri uyu mwaka w’imikino, Rayon Sports yabaye iya kabiri muri shampiyona nyuma ya APR FC yanayisezereye muri ¼ cy’igikombe cy’Amahoro itojwe n’abatoza babiri, Umufaransa Didier Gomez da Rosa n’Umubiligi Luc Eymael.

Gomez yatoje Rayon Sports imikino 34 ya shampiyona agatsinda 25 akanganya ine, tariki ya 15 Gicurasi 2013 yahesheje iyi kipe igikombe cya shampiyona yaherukaga mu 2004. Luc Eymael we yasheshe amasezerano tariki ya 10 Gicurasi 2014,yari asigaje amezi ibiri nyuma yo guhagarikwa imikino 8 n’Ishyirahamwe ry’umupira w’amaguru mu Rwanda nyuma y’imvururu zakurikiye umukino wa shampiyona wa Rayon Sports na AS Kigali.

Muri Kanama, Rayon Sports izakina imikino ya CECAFA Kagame cup mu gihe ishobora guserukira igihugu igihe APR FC yaba itwaye igikombe cy’Amahoro itsinze Police FC kuri uyu wa Gatanu, tariki ya 4 Nyakanga 2014.

Inkuru : Rayon Sports website

Tanga igitekerezo na Facebook

Tanga igitekerezo