Rayon na APR ntizatsinze imikino y’ibirarane

Yanditswe na Rwanda Football ku wa 29.04.2015 saa 20:35 | Yasuwe : 1,295

Mu mikino y’ibirarane aya makipe atari yarakiniye igihe ,kuri uyu wa gatatu Rayon Sports yanganyije na Sunrise i Muhanga naho APR FC inganya na Gicumbi FC i Byumba. . Ibi ariko ntacyo byahinduye ku rutonde rw’agateganyo rwa shampiyona iri kugana ku musozo.

APR FC i Gicumbi yahanganyirije igitego kimwe kuri kimwe na Gicumbi FC, igitego cya APR FC cyatsinzwe na Ngomirakiza Hegman mu gice cya kabiri naho Jean Paul Kayigamba wa Gicumbi, umusore w’imyaka 18 wiga mu mashuri yisumbuye, yishyura iki gitego ku ishoti rikomeye habura iminota itanu ngo umukino urangire, uza no kurangira gutyo.

Naho ku mukino waberaga i Muhanga aho Rayon Sports yakirira abayisuye, iyi kipe y’i Nyanza yarushije kugumana umupira Sunrise FC y’i Rwamagana ariko uburyo bwose bwabonetse ntacyavuyemo. Sunrise nayo yanyuzagamo igasatira.

migigicumbi

Imipira yaturukaga ku mpande ya Fuadi Ndayisenga yasangaga ba myugariro ba Sunrise bahagaze neza, cyane cyane umuzamu wayo Robert Shyaka, wahoze muri Mukura VS, wagaruye imipira myinshi ikomeye.

Rayon  yakinaga idafite abakinnyi nka Leon Uwambajimana wavunitse, Peter Kagabo na James Tubane bafite amarita abiri y’umuhondo, yagowe n’umusore ukina hagati witwa Mike Segawa wa Sunrise FC wagaragaje ubuhanga n’amacenga akomeye n’ubwo ntacyo byatangaga mu gutsinda.

Nyuma y’uyu mukino umutoza Thierry Nzonga wa Sunrise yavuze ko yaje azi neza ko Rayon ikunda gukinisha impande bityo agerageza kukinisha abakinnyi be bibanze ku gufunga izo mpande ari nabyo bimuhaye inota rimwe.

Baptsite Kayiranga wa Rayon we yatangaje ko match yasaga n’uyifite mu biganza ariko yagize amahirwe macye. Ati “Ndemera ko na Sunrise yari ifite ubwugarizi buhagarara neza.”

Umukino w’ikirarane wagombaga guhuza Marines na Etincelles wo ukaba warimuwe. Ku rutonde rw’agateganyo, APR FC igumye ku mwanya wa mbere n’amanota 49, Rayon kuwa kane n’amanota 35.

Tanga igitekerezo na Facebook

Tanga igitekerezo