Pre-season : Amakipe y’ibigugu yasezerewe

Yanditswe na Admin ku wa 14.09.2014 saa 10:08 | Yasuwe : 1,129

Mu mpera z’icyi cyumweru ku Gisenyi n’i Rwamagana amakipe ya Etincelles na Sunrise yateguye imikino yo kwitegura shampiyona y’icyiciro cya mbere izatangira mu cyumweru gitaha. 

Kuri stade Umuganda i Rubavu mu mukino wa mbere  ikipe ya Police FC yanyagiye  Virunga FC  yi Goma muri Congo  ibitego 7-2.

Police FC ntiyatinze kureba mu nshundura kuko kuko ku munota wa gatandatu gusa umukinnyi mushya wavuye mu Isonga Rashid yafunguye amazamu ku mupira mwiza yatereye kure .

Virunga FC nayo yahise ikanguka itangira kwinjira mu mukino ku buryo ku munota wa 12 kapiteni wayo  Nkunzingoma Ramadhan  yayitsindiraga igitego nawe yatereye kure.Tubibutse ko uyu Nkunzingoma Ramadhan ari umwe mu babatijwe  akaba yari mu izamu ry’Amavubi muri CAN 2004.

Mu minota yakurikiyeho Police FC yarushaka cyane Virunga yabonye ibindi bitego biriri kimwe cya Mbaraga Jimmy ku ishoti nawe  yatereye kure y’izamu, mbere yuko Jacques Tuyisenge  uhagaze neza atsinda igitego cya gatatu kuri Coup Franc.

Ubwo igice cya mbere cyaganaga ku musozo, ikipe ya Virunga yaje gutsinda igitego cya kabiri maze igice cya mbere kirangira ari ibtego 3-2.

Igice cya kabiri cy’umukino Police yaje itandukanye cyane ndetse ishobora gutsinda ibindi bitego bine bya Jacques Tuyisenge watsinzemo bibiri, Mugabo Gabriel na Braza wavuye mu ikipe ye SEC na bo batsinda ibindi nkibyo byatumye umukino urangira ari 7-2.

preseason14

Mu wundi mukino ikipe ya Rayon Sports ntiyabashije kwitwara neza kuko yatsinzwe na Etincelles kuri penaliti nyuma yuko umukino warangiye ari   0-0.

Rayon Sports nubwo yakinnye umukino mwiza kandi ushimishije ariko cya kibazo cyo kureba mu izamu gikomeje kuyibera ingorabahizi  cyakomeje kwigaragaza nubwo abafana bayo bari biteze ibitangaza kuri rutahizamu mushya uri mu igeragezwa John Ibunda iyi kipe yakuye muri Saint Eloi Lupopo yo muri Congo.

Uyu ariko nawe  ntacyo yagaragaje kuko yanasimbuwe nta mupira numwe ateye mu izamu. Abandi bakinnyi nabo nka Yossa Bertrand , kapiteni Fuad Ndayisenga, na Isaac Muganza nbo ntako batagize bashakisha ibitego ariko umunyezamu wa Etincelles akababera ibamba.

Umukino warinze ugera ku musozo bikiri  0-0 biba ngombwa ko amakipe yombi akizwa  na penaliti kugirango hamenyekane uzakina na Police. Abakinnyi ba Etincelles bose  binjije penaliti zabo ariko e Djihad wa Rayon Sports ayitera mu kirere ubwo Etincelles itsinda kuri penaliti 5-3.

Kuri iki cyumweru, Rayon Sports izahura na Virunga ku mwanya wa gatatu  ku i saa 13:00 mbere yuko Police na Etincelles zikina ku mukino wa nyuma.

Mu yindi mikino nkiyo yabereye i Rwamagana kuri uyu wa gatandatu, AS Kigali yatsinze Mukura Victory Sport 1-0, igitego cyatsinzwe na Ernest Sugira wari ugiye gusazira ku gatebe ka APR  ubwo hari  ku munota wa 75 w’umukino.

Undi mukino wahuje ikipe yari yasuwe ikizamuka mu cyiciro cya mbere Sunrise n’ikipe ifite igikombe cya shampiyona giheruka ya APR FC.

APR FC yari yabanje mu kibuga ikipe yayo ya mbere uvanyemo  buretse kapiteni w’iyi kipe Kodo utarasinya amasezerano, na Ndahinduka Michel wavunitse.

Umukino warimo ishyaka no guhangana ku mpande zombi, Sunrise yari imbere y’abakunzi bayo ikaba yatangiye ishaka gutungura APR FC.

Hashize iminota nka 15, APR FC ni yo yahise itangira kuyobora umukino, ndetse inasatira bigaragara ikipe ya Sunrise, wabonaga ko abataha izamu ba APR FC batoroheye umuzamu Saaka Robertwari uhagaze neza

Mu gice cya kabiri  cy’umukino APR FC yatangiye ishaka uko yabona igitego  isatira Sunrise, ariko Saaka Robert akomeza kubera ibamba ab’imbere  ba APR FC, nyuma yaho Bahame Arafat yari amaze kwinjira mu kibuga asimbuye Djamal Mwiseneza utari uhagaze neza .

Mu minota ya nyuma Sunrise yasatiriye cyane APR FC wabonaga ko iri gucungira kuri contre attaque, igera imbere y’izamu rya Olivier inshuro nyinshi, ariko ikibazo kikaba gutera mu izamu.

Umukino warangiye ari 0-0 ku mpande zombi, hakurikiraho gutera za Penaliti, maze ikipe ya Sunrise ibasha gusezerera APR FC yinjije penaliti 4 kuri 2 za APR FC, nyuma yuko abakonnyi Hegman Ngomirakiza na Herve Rugwiro bazihushije.

Kuri iki cyumweru hateganyijwe  imikino ibiri  ariyo  Mukura VS na APR FC  zirahatanira umwanya wa 3, guhera saa saba, naho ikipe ya AS Kigali, ihura na Sunrise ku mukino wa nyuma, guhera i saa cyenda n’igice.

Tanga igitekerezo na Facebook

Tanga igitekerezo