Perezida wa FIFA yihanganishije umuryango wa Mutuyimana Evariste

Yanditswe na Rwanda Football ku wa 15.09.2017 saa 11:17 |

Nyuma y’urupfu rutunguranye rwa nyezamu Mutuyimana Evariste warindiraga ikipe ya Rayon Sports, abakinnyi , abatoza n’abayo bozi batandukanye bakomeje kwihanganisha umuryango wa Evariste.

Gianni Infantino uyobora impuzamashyirahmwe y’umupira w’amaguru ku isi (FIFA) na we yohereje ubutumwa bwo kwihanganisha umuryango wa Evariste Mutuyimana.

Ni ubutumwa bwatanzwe na Perezida wa FERWAFA , Nzamwita Vincent de Gaule muri iki gitondo cyo kuri uyu wa Kane tariki 14 Nzeli 2017.

Perezida wa FIFA, Gianni Infantino

Mu butumwa yatanze, Infantino yagize ati “ Evariste Mutuyimana yari umukinnyi w’ingenzi muri Rayon Sports nyuma yaho yari amaze imyaka ibiri akinira Sofapaka muri Kenya. Ku rwego mpuzamahanga yagiye ahamagarwa mu ikipe y’igihugu y’u Rwanda (2010-2013). Azahora yibukirwa kandi ku kuba yari umuntu usabana, inshuti ndetse no gukora cyane.Reka mfate umwanya mu izina ry’umuryango mpuzamahanga w’umupira w’amaguru cyane mu Rwanda mbihanganishe. Ubu ngomba kugaragaza imbamutima n’ubufasha bunturutseho mu gukomeza gushyigikira umuryango we n’abo bafitanye isano.”

Ibaruwa ya perezida wa FIFA

Abinyujije kuri Twitter, ku wa kabiri w’iki cyumweru, Ministiri w’umuco na Siporo, Uwacu Julienne na we yihanganishije umuryango w’uyu mukinnyi ndetse n’aba-Sportifs muri rusange.Ishyirahamwe ry’umupira w’amaguru mu Rwanda, FERWAFA, naryo yihanganishije ubuyobozi bw’iyi kipe, umuryango mugari wayo ndetse n’umuryango w’uyu mukinnyi ribinyujije mu ibaruwa ryoherereje ubuyobozi bwa Rayon Sports.Ikipe ya APR FC nayo iri mu makipe yihanganishije umuryango wa Mutuyimana Evariste ibinyujije mu ibaruwa yoherereje Rayon Sports.

Mu gitondo cyo ku wa kabiri tariki 12 Nzeli 2017 nibwo hamenyekanye inkuru y’akababaro y’urupfu rwa Mutuyimana Evariste wari nyezamu w’ikipe ya Rayon Sports azize urupfu rutunguranye.

Mutuyimana Evariste yapfuye amarabira mu ijoro ryo kuri uyu wa mbere rishyira kuri uyu wa kabiri. Ni umwe mu bakinnyi ba Rayon Sports bari bakoze imyitozo ku munsi w’ejo hamwe na bagenzi be bitugura umukino wa 2 w’irushanwa Agaciro Football Championship bagomba guhuramo n AS Kigali kuri uyu wa Gatatu. Icyamuhitanye nanubu ntikiramenyekana ariko umubiri we wahise ujyanwa mu bitaro bya CHUK gukorerwa isuzuma.

Uretse Rayon Sports, Mutuyimana Evariste yanakiniye Kiyovu Sports, Police FC yamenyekaniyemo mbere yo kwerekeza muri Sofapaka yo muri Kenya. Muri 2016 nibwo yagarutse mu Rwanda, aba nyezamu wa 2 wa Rayon Sports anayifasha kwegukana igikombe cya shampiyona y’umwaka ushize.

Tanga igitekerezo na Facebook

Tanga igitekerezo

Powered by Live Score & Live Score App