Nizeyimana Olivier abona Mukura nk’ikipe ikomeye umwaka utaha

Yanditswe na Admin ku wa 23.07.2015 saa 12:30 | Yasuwe : 961

Nizeyimana Olivier, Perezida wa Mukura Vicyory Sports atanga icyizere ku bakunzi b’iyi kipe ko umwaka utaha izaba ari ikipe ihanganira ibikombe, nyuma yo gukosora amakosa ya tekinike n’ayo mu buyobozi yagaragaye akaba intandaro y’umusaruro muke muri uyu mwaka wa Shampiyona wa 2014-2015.

Uyu muyobozi ashingira ahanini ku kuba ikipe izongera kwakirira imikino yayo kuri Sitade Huye, abafana bakundaga kwita “IMBEHE YA MUKURA”, ibi ngo bikazatuma abafana bashyigikira ikipe yabo bayibona hafi.

Mukura V.S yarangije shampiyona iri ku mwanya wa 10 ifite amanota 29 ndetse ntiyarenga kimwe cya kane mu gikombe cy’Amahoro.

Muri uyu maka ikipe yatandukanye n’umutoza Kayiranga Baptiste nyuma yo gutanga umusaruro muke. Kugeza ku munsi wa gatandatu wa Shampiyona, uyu mutoza yari amaze kunganya imikino ibiri gusa, atsindwa ine.

Baptiste yasimbuwe na Okoko Godefroid, wari warigeze gutoza Mukura hagati ya 2011 na 2011. Uyu murundi yatangiye gutoza Mukura ku munsi wa munani wa Shampiyona atakaza imbere ya APR FC (0-2). Mu mikino 18 isigaye yatsinzemo itandatu, anganyamo imikino umunani, atakazamo itanu. Ku munsi wa 24 wa Shampiyona ni bwo abakunzi ba Mukura bizeye ko ikipe itakimanutse mu cyiciro cya kabiri ubwo Etincelles yatsindwaga 1-0 na Police.

mukura

Muri ibyo bihe byose bibi, abafatanyabikorwa b’imena ba Mukura bakomeje kuyiba hafi ntibacika intege. Ku Isonga haza akarere ka Huye kagenera Mukura igice cy’amafaranga ku ngengo y’imari yako.

Hari kandi Volcano Express. Iyi Agence itwara abagenzi yakomeje gufasha Mukura mu ngendo zayo aho yabaga igiye gukina umukino hose. Muri urwo rugendo rutoroshye, abakinnyi ntibigeze bicwa n’inyota bakina cyangwa mu myitozo kuko Amazi ya Huye yakomeje kubegeraho.

Mu kiganiro kirambuye yagiranye n’Imvaho Nshya, Perezida Nizeyimana, usanzwe ayobora Volcano Express yavuze ko afite icyizere ko Mukura izongera kugaruka mu ruhando rw’amakipe yubashywe mu Rwanda.

Ikibazo : Bwa mbere muri shampiyona, mwatsinze Étincelles FC ibitego 3-0. Ni kumpera ya shampiyona, kare kose haburaga iki ?

Nizeyimana : Birakomeye kugira ngo jye nka Perezida nkubwire icyaburaga. Ikipe tugerageza kuyiha ibyangombwa byose bikenewe, abakinnyi tubafata neza bishoboka, cyane cyane tugereranyije n’ikipe zidutsinda. Icyo tumaze kubona nk’abayobozi ni uko tugorwa no kutagira ikibuga, nko mukino twakiriye wa Etincelles, hari abafana batakwishyura nibura amafaranga twatanze ku mbangukiragutabara (Ambulance). Usibye ko hari n’ibibazo bya tekinike bishobora gutuma ikipe itsindwa, tuzicara nka komite turebe ibibazo byose bitagenze neza, tugerageze kubikemura.

Ikibazo : Ubwo nari i Butare, bamwe mu bakunzi ba Mukura twahuye bambwiye ko bababajwe bikomeye n’iyi kipe, bamwe bati :” agahinda kazadusatura umutima, Mukura yacu abayobozi barayishe” , nka perezida ubasobanurira gute umusaruro w’ikipe uyobora ?

Nizeyimana : Umusaruro w’ikipe ya Mukura koko ni mubi cyane, natwe ntidushimishwa no kuba hari aho twageze duharanira kutajya mu cyiciro cya kabiri.
Icyo mbwira abo bafana, uwo musaruro twese uratubabaza, ntabwo twaje gushaka amafaranga muri Mukura . Twafashe iya mbere tuza kuyobora iyi kipe. Mpamya ko nitubona ikibuga cyacu, byose bizahinduka,mukabona Mukura itandukanye n’iyi.Abakinnyi bacu bakeneye ababakomera mu mashyi, bakwitwara neza bakabagurira Fanta, ibyo ntabyo bafite, nabyo bigira ingaruka mu kutitwara neza.

Ikibazo : Amakuru yagiye hanze ni uko abakinnyi bafashwe nabi, bikavugwa ko bigeze kubura amazi aho baba, n’ifatabuguzi ry’amashusho, abakinnyi bakuvuga ko bagaburirwa nabi n’ibindi. Ubivugaho iki ?

Nizeyimana : Birashoboka ko hari ibishobora kubura, ariko muri rusange abakinnyi bacu babayeho neza, ugereranyije n’uko izindi kipe zibayehop cyangwa ni uko byari bisanzwe. Tugerageza kubafata neza, n’ ubwo nta byera ngo de, amazi ashobora kubura.
Tugarutse kuby’abafana wavugaga, tugira abafana benshi ba Mukura mu mujyi wa Huye ,badufasha bakaduha nk’inyama ku bazicuruza, bakaduha ibiryo. Sinavuga ko ikipe ya Mukura ifashwe nabi ku buryo byasobanura umusaruro mubi twagize.Iyo bitagenze neza, abantu bashakisha izindi mpamvu kandi birumvikana, dukwiye gukosora byose

Ikibazo : Umwaka urarangiye, nka komite murateganya iki ku mwaka utaha ? Hari abakinnyi muzirukana, umutoza Okoko afite amasezerano arangirana n’uyu mwaka, mugiye gukora iki ?

Nizeyimana : Ntabwo turicara hasi ngo tubirebe, ni ibintu bisaba inama iri tekinike.
Ku bijyanye n’umutoza, ntabwo twari dufitanye amasezerano y’igihe kirekire, ariko gahunda dufite nka Komite ni iyo kugumana nawe naramuka abyemeye, tuzicara tuganire turebe.

Ikibazo : Muzaganira ryari ?

Nizeyimana : Tuzaganira umwaka w’imikino urangiye. Erega dufite n’abakinnyi beza, dushobora kongeramo abakinnyi bake ariko abenshi tuzagumana, ntabo twiteguye kwirukana.

Ikibazo :Mutangira umwaka mwari mwavuze ko mushaka kuzamura abakinnyi bakomoka i Huye, Tuvuze ko byabananiye twaba tubeshye ?

Nizeyimana : Ntimwaba mubeshye. Impamvu iyo politike yatunaniye nayo yakumvikana, kiriya kibuga dukoreramo imyitozo (Sitade Huye) tugifite iminota mike cyane. Ntiwazamura abakinnyi udafite ikibuga, nitubona sitade tuzagira amasaha ya mugitondo yo kwita ku bana , nimugoroba twite ku ikipe nkuru. Ariko niba dukora imyitozo batubarira iminota ntibyoroshye kuhazamurira umwana.

Tanga igitekerezo na Facebook

Tanga igitekerezo