Okoko Godefroid yagarutse muri Mukura

Yanditswe na Rwanda Football ku wa 09.11.2014 saa 22:35 | Yasuwe : 975

Nyuma y’imyaka ibiri avuye muri Mukura VS, Umurundi Okoko Godfroid wari umutoza wa Musanze yasimbuye Kayiranga Baptiste wirukanywe kuri uyu wa Kane.

Umwe mu bayobozi ba Mukura VS yagize ati “ Nibyo koko Okoko yagarutse muri Mukura VS.”Nyuma yo kunganya na Police FC, Ntakirutimana Emmanuel, umunyamabanga wa Mukura VS yari yavuze ko ku mugoroba wo kuri uyu wa Mbere hashobora kumenyekana abasabye gutoza Mukura VS.

Abajijwe niba Okoko yaba yasabye akazi, yagize ati “ Okoko ni umutoza mwiza yavuye muri Mukura VS neza ashobora kugaruka ariko ntaratwandikira ibaruwa.”

Okoko Godfroid wari umutoza wa Musanze yagizwe umutoza wa Mukura VS kugera muri Nyakanga 2015 nkuko ubuyobozi bw’ikipe bwamaze kumwemeza mu bandi batoza batanu bahatanaga.

Umunyamabanga mukuru w’iyi kipe akaba n’umuvugizi wayo Emmanuel Ntakirutimana yagize ati: “Mukura VS yamaze kwemeza Okoko nk’umutoza mukuru wa yo. Bikorewe mu nama yigaga dosiye 5 z’abari basabye kuyitoza.”

Okoko asanze Mukura VS ku mwanya wa 13 n’amanota atatu, asimbuye Kayiranga Baptiste wirukanwe mu cyumweru gishize kubera umusaruro muke ahabwa inshingano yo kuyiha umusaruro no kuyishyira ku mwanya mwiza nibura mu makipe ane ya mbere.

Okoko-Godfroid

Okoko we yavuze ko bishoboka kubona uriya mwanya mu gihe asanga Mukura VS ifite abakinnyi bashoboye, agiye kubacengezamo amatwara ye ndetse n’imyitozo myinshi.

Yagize ati “Ikipe ni nziza, ifite abakinnyi beza ariko bakeneye imyitozo.Umwanya mubi bariho si umutoza uzabakuramo, abakinnyi bazibagirwe ibibazo byabo,bemera ko ari abakinnyi kandi bigirire icyizere ko bashoboye.”

Inshingano ya mbere ya Okoko ni ugutsinda umukino wa APR FC kuwa Gatandatu, tariki ya 22 Ugushyingo 2014 akagarura icyizere mu bakinnyi, abayobozi n’abatoza.

Yagize ati “Ni urugamba tugiyeho, APR FC ni ikipe iri mu cyiciro cya mbere kimwe nka Mukura, ikibazo ni uko bamwe bafite uburyo ariko mu kibuga ni abakinnyi ku bandi kandi mfite na njye abakinnyi beza.”

Okoko yagiye muri Mukura VS nyuma y’iminsi mike agizwe umutoza wa AS Muhanga mu Mata 2011 asimbuye Ebwele Richard wari uzwi nka Capello wari ufite amanota atanu mu mikino 13 ya shampiyona.

Uyu Murundi yabanje gutoza Kibuye FC, mu 2008 ajya muri Kiyovu Sports, anyura muri AS Muhanga, Mukura VS ayivamo ajya muri La Jeunesse aguranye na Ruremesha Emmanuel.Ubwo La Jeunesse yasenyukaga yari yayigejeje ku mwanya wa gatanu, Okoko yasubiye i Burundi agaruka mu Rwanda atoza Amagaju ayavamo ajya muri Musanze.

Okoko yagiye muri Mukura VS mu 2011-12 asimbuye Munyankindi Jean Paul isoza ku mwanya wa gatatu wa shampiyona.

Ku munsi wa 8 wa shampiyona, tariki ya 22 Ugushyingo 2014, Mukura VS izakira APR FC

Tanga igitekerezo na Facebook

Tanga igitekerezo