Nyuma yo gutsindwa na Afurika y’Epfo, Amavubi agiye kwerekeza muri Ecosse

Yanditswe na Rwanda Football ku wa 30.07.2015 saa 20:13 | Yasuwe : 820

Nyuma yo gutsindwa na Afurika y’Epfo ibitego 2 ku busa,  ikipe y’u Rwanda  igomba kwerekeza  muri Ecosse mu rwego rwo kwitegura  umukino wa Ghana mu gushaka itike ya CAN 2017 uzabera mu Rwanda taliki 04 Nzeri 2015.

Mu mukino Amavubi yatsinzwe n’Afurika y’Epfo, umutoza Jonathan Brian McKinstry yakoresheje abakinnyi bakina imbere mu gihugu mu rwego  rwo gutegura ikipe izakina imikino ya CHAN 2016 izabera mu Rwanda.

Ibi ni byo byatumye ahamagara bamwe mu bakinnyi bataherukaga mu ikipe y’igihugu barimo Twagizimana Fabrice, Uwiringiyimana Amani, Ntamuhanga, Rukundo n’abandi.

Gusa nk’uko tubikesha ishyirahamwe ry’umupira w’amaguru mu Rwanda “FERWAFA”, McKinstry yishimiye bamwe mu bakinnyi   n’ubwo batitwaye neza ngo batsinde.Yagize ati “Uyu mukino wansingiye ishusho nziza y’abandi bakinnyi nshobora kuzongera mu ikipe nkuru”.

amavsa15

Amavubi agiye kwerekeza muri Ecosse

Umutoza w’Amavubi agomba gushyira ahagaragara, abakinnyi azajyana mu mwiherero w’ibyumweru bibi muri Ecosse aho ikipe izava mu Rwanda taliki 02 ikagaruka 17 Kanama 2015.

Muri uyu mwiherero, Amavubi azakina imikino  igera muri itatu ya gicuti n’amakipe yo mu cyiciro cya mbere muri Ecosse   ikomeze yitegure umukino wa Ghana.

Nyuma y’uyu mwiherero, mu mpera z’ukwezi kwa Kanama 2015, Amavubi ashobora gukina umukino wa gicuti na  RDC na Congo Brazzaville mu gutegura umukino wa Ghana uzaba ari uwa kabiri mu itsinda H mu mikino  y’amajonjora yo gushaka itike ya CAN 2017.

Ikipe y’u Rwanda yitwaye neza ku mukino wa mbere itsindira Mozambique iwayo ifite amahirwe yo kuba yakwerekeza muri CAN 2017 mu gihe yakwitwara neza. Amavubi aheruka muri CAN  muri 2004.

Tanga igitekerezo na Facebook

Tanga igitekerezo