Ntagwabira yiteguye kungiriza Goran wageze muri Simba SC

Nyuma y’aho bitangajwe ko Ntagwabira Jean Marie ashobora kujya gutoza muri Simba SC  yo muri Tanzania akungiriza Goran Kopunovic ngo yiteguye gufatanya n’uyu watoje Police FC igihe ibiganiro byaba birangiye.

Ntagwabira yatangaje ko  bakiri mu biganiro na Simba SC ko nibirangira azabitangariza itangazamakuru, yemeza ko yiteguye gukorana n’umunya Serbiya Goran Kopunovic watoje Police FC imyaka itatu. Yagize ati “ Nta kibazo gukorana na Goran, reka mbere na mbere dutegereze ko ibiganiro birangiza.”

ntagwabira

Kuri uyu wa Gatatu nibwo Goran wabaga muri Vietnam yageze ku kibuga cy’indege mpuzamahanga cyitiriwe Julius Nyerere mu mujyi wa Dar es Salaam.Goran yagize ati “ Sinshaka kuvuga kuri Yanga kuko nziko zihangana, icyo ndeba ni ugutegura Simba igihe ibiganiro byaba birangiye neza.”

Simba SC yitabaje Jean Marie Ntagwabira mu gihe ikomeje kwitwara nabi kuko iri ku mwanya wa 10 n’amanota 9 nyuma y’imikino 8 ya shampiyona, aho mu mukino yakinnye mu mpera z’iki cyumweru gishize yatsinzwe na kagera Sugar igitego 1-0 .

Nk’umutoza mu Rwanda, Jean marie yatoje mu ikipe y’igihugu, APR FC, Rayon Sports, Kiyovu Sports na ATRACO. Muri 2004, APR FC yatozwaga na Ntagwabira yasezereye Zamalek yo mu Misiri nyuma yo gutsindwa ibitego 3-2 i Cairo ikayisezerera i Kigali itsinze ibitego 4-1 muri CAF Champions League.

Ibiganiro bigenze neza, Goran Kuponovic na Ntagwabira Jean Marie basimbura Umunyazambia Patrick Phiri wasezerewe kubera umusaruro muke aho mu mikino 8 ya shampiyona yanganyije imikino 6 ibanza batsinda umwe batsindwa na Kagera Sugar igitego 1-0.

 

Tanga igitekerezo na Facebook

Tanga igitekerezo