Ntagwabira Jean Marie yashyinguwe

Yanditswe na Admin ku wa 05.02.2015 saa 20:23 | Yasuwe : 674

Kuri uyu wa kane nibwo Umutoza Rtd Cpt Jean Marie Ntagwabira wabaye umutoza wa APR FC, Rayon Sports, Kiyovu Sports na Atraco yashyinguwe mu irimbi rya gisirikare i Kanombe.

Ni umuhango witabiriwe n’abayobozi b’igisirikare cy’u Rwanda cyari gihagarariwe Lt Gen Fred Ibingira, umugaba mukuru w’Inkeragutabara, abayobozi muri Minisiteri w’umuco na siporo, Ishyirahamwe ry’umupira w’amaguru mu Rwanda (FERWAFA), amakipe nka APR FC, Kiyovu Sports, Sunrise na Police FC, abatoza bagenzi be abakinnyi, abanyamakuru n’inshuti n’abavandimwe.

Benshi batanze ubuhamya ku buzima babanyemo na Ntagwabira mu mupira w’amaguru no mu gisirikare.

Gen Ibingira yavuze uko Ntagwabira wari muto cyane yinjiye mu gisirikare cyari icya APR ahitamo kureka amashuri n’abafana bari benshi mu makipe yakiniraga i Burundi yiyemeza kubohora igihugu ahari abafana biyemeje gusa.

Mu gihe intambara yari ihagaritswe bari mu mishyikirano hatangijwe igitekerezo cy’imikino maze Ntagwabira na bagenzi be nka Byusa Wilson “Rudifu” batangira gukina shampiyona za batayo mu mupira w’amaguru.

Batayo ya 21 Ntagwabira yakinagamo yabaga ihanganye n’iyarindaga abayobozi bakuru b’ingabo (High Comand) kugera igihe ayigiriyemo mbere y’uko intambara isubukurwa.

Ibingira yavuze ko Ntagwabira yaje kumenyekana cyane ubwo yatsindaga igitego batsinda PSD y’abakombozi mu 1993 mu mukino wabereye ku Mulindi wa Byumba ahari biirindiro bya APR.

Ubwo intambara yo kubohoza igihugu yasubukurwaga Ntagwabira yari mu basirikare bakoreshaga intwaro zirasa kure bari bayobowe na Minisitiri w’ingabo Gen James Kabarebe.

ntagwabirajmv1

Gen Ibingira yagize ati “Twakiniraga ku kibuga kibi kinyerera ariko ntiyanyereraga, [bagenzi be] bagatera urwenya ko ari ukubera uko areshya, uko twamumenyeye ku rugamba ni nako twamumenye mu rwo gusabana no kubaka ibyishimo.”

Mu izina ry’ubuyobozi bukuru bw’igisirikare cy’u Rwanda, Gen Ibingira yavuze ko baakomeza gufasha abana babiri Ntagwabira asize aribo Ntagwabira Haruna na Ntagwabira Cedric.

Nzamwita Vincent, Umuyobozi wa FERWAFA yavuze ko babuze umuntu wafatiye runini umupira w’amaguru, wari utangiye kwita ku iterambere ry’umupira w’amaguru mu Rwanda cyane mu ikipe ya Sunrise yari abereye umuyobozi wa tekiniki.

Yagize ati ” Tuzafasha abana asize uko bishoboka mu mashuri mu gihe tukiri muri FERWAFA na nyuma y’aho kugera aho bishoboje.”

Abayobozi b’amakipe n’abatoza bakoranye bavuze uko bakoranye na Ntagwabira mu gihe abakinnyi benshi yatoje bari baje kumuherekeza.

Abo mu muryango we bavuze ubuzima bwe, benshi bishimira ko Ntagwabira apfuye nyuma yo kwihana no kuyoboka Imana.

Ntagwabira yavukiye i Bujumbura tariki ya 11 Nyakanga 1974 nyuma y’amashuri yagiye mu gisirikare cya RPF – Inkotanyi mu rugamba rwo kubohoza igihugu ahabwa ipeti rya kapiteni

Ntagwabira yabaye umukinnyi wa APR FC anayibera umutoza, atoza kandi na ATRACO FC, Kiyovu Sports, Rayon Sports, yapfuye yari umuyobozi wa tekiniki muri Sunrise.

Nyakwigendera Ntagwabira Jean Marie w’imyaka 41 yakiniye Amavubi imikino 15 ayabera umutoza wungirije ubwo bakinaga igikombe cy’Afurika mu 2004.

Atabarutse asize abana babiri b’abahungu.Umukuru witwa Ntagwabira Haruna afite imyaka 13, naho umuto akitwa Ntagwabira Cedric w’imyaka 6.

Tanga igitekerezo na Facebook

Tanga igitekerezo