Nta gitunguranye ,Rtd Brig. Gen. Sekamana Jean Damascène atorewe kuyobora Ferwafa

Yanditswe na Rwanda Football ku wa 31.03.2018 saa 16:33 |

Rtd Brig. Gen. Sekamana Jean Damascène niwe watorewe kuyobora Ferwafa mu myaka ine iri imbere akaba asimbuye   Nzamwita Vincent de Gaulle wayiyoboye kuva  2014-2018.

Aya matora yo kuri uyu wa Gatandatu tariki ya 31 Werurwe 2018, abaye asubiyemo nyuma y’aho abanza yari yabaye ku wa 30 Ukuboza 2017 yarangiye habuze utsinze hagati ya Nzamwita Vincent De Gaulle na Rwemalika Félicité.

Brig. Gen. Sekamana wari uherutse gusezererwa mu gisirikare, yatsinze ku majwi 45 mu gihe Rurangirwa bari bahanganye yagize amajwi arindwi, imfabusa iba imwe.

Abanyamuryango 53 nibo batoye, aho mu gutora hinjiraga umuntu umwe umwe mu bwihugiko agatora batamureba akazana urupapuro rw’itora mu gakangara kabugenewe imbere ya komisiyo y’itora.

Ubwo yiyamamazaga, Sekamana yavuze ko mu kigereranyo yakoze ku mupira w’amaguru n’izindi nzego z’igihugu kuva mu 1994 nyuma ya Jenoside yakorewe Abatutsi, ko arirwo rwego rudatera imbere akaba ari nayo mpamvu yiyemeje kuzamo kugira ngo atange umusanzu we.

Nzamwita wari uyoboye Komite icyuye igihe ya Ferwafa, yashimiye abo bakoranye mu myaka ine ishize ku kazi keza bakoze anenga bamwe mu bari kwiyamamaza kuri iyi manda bavuze ko bazaca amakimbirane muri Ferwafa.Aha yasobanuye ko nta makimbirane yigeze abaho ahubwo ibyabaga ari ukutumvikana ku bitekerezo kandi kuri we aribyo demokarasi.

De Gaulle yavuze ko nubwo atakiri Umuyobozi wa Ferwafa azakomeza gufatanya n’abari ku buyobozi gushaka icyateza imbere ruhago yo mu Rwanda.

Yanasabye ko hazashyirwaho amategeko akomeye abuza abanyamuryango kujya mu matsinda aharanira impinduka [Coalition for changes] kuko asanga nta cyo bifasha ahubwo igihe hari ibitumvikanwaho byajya biganirirwa mu Nteko Rusange.

Abakandida babiri bari bahanganye mbere y’uko amatora aba, bahawe umwanya w’iminota itanu buri umwe haherewe kuri Rtd. Brig. Gen. Sekamana yibwira abanyamuryango n’abo azafatanya nabo muri komite ye kimwe n’imigabo n’imigambi afite.

Sekamana abaye undi musirikare uyoboye Ferwafa

Brig. Gen. Jean Damascène Sekamana w’imyaka 60 y’amavuko wari umwe mu basirikare bakuru mu Ngabo z’u Rwanda, yemerewe kujya mu kiruhuko cy’izabukuru muri Mutarama uyu mwaka asezeye mu ngabo yinjiyemo zikiri RPA, mu 1990.Brig. Gen. Sekamana si we muntu ufite ipeti riri hejuru mu gisirikare uyoboye Ferwafa kuko Lt. Gen. Caezar Kayizari yayiyoboye hagati ya 1995-2005 na Maj. Gen. Kazura Jean Bosco ayiyobora hagati ya 2006-2011.

Brig. Gen. Sekamana  abaye umuntu wa 16 uyoboye FERWAFA kuva iri shyirahamwe ryabahi mu 1972. Dore uko
abayoboye urwo rwego  bagiye bakurikirana bakaba bose biganjemo abasirikari:

1. Captain Bizimana
2. Dr Gasarasi
3. Mudenge Canezius
4. Ngango Felicien
5. Colonel Mayuya
6. Twagiramungu Faustin
7. Dr Ndagijimana Emmanuel
8. Mvuyekure Viateur
9. Nkubito Alphonse
10. Gasasira Ephrem
11. Lt col Ciiza Kayizali (niryo peti yari afite icyo gihe ajya kuyobora FERWAFA)
12. Major Agaba
13. Brig General Kazura J Bosco (niryo peti yari afite icyo gihe ajya kuyobora FERWAFA)
14. Ntagungira Celestin
15. Nzamwita Vincent Degaule

Tanga igitekerezo na Facebook

Tanga igitekerezo

Powered by Live Score & Live Score App