Nshimiyimana ashobora kujya muri Kiyovu

Nshimiyimana Eric ashobora gutoza ikipe ya Kiyovu Sports mu mwaka utaha wa shampiyona.
Byumvuhore Muddy, umunyamabanga akaba n’umuvugizi wa Kiyovu Sports yatangarije Izuba Rirashe, ati ” turi mu biganiro n’umutoza Eric Nshimiyimana ashobora kutubera umutoza, ariko hari n’ibyo tutarumvikanaho”.
Muddy avuga ko Eric bakiri mu biganiro batazi neza ko azababera umutoza, ariko bakaba bafite icyizere kandi ari nawe bifuzaga kuba yabatoza bitewe n’uko ibyo afite aribyo bifuza.
Byumvuhore ati ” umutoza tuzafata tuzamuha amasezerano y’igihe gihagije, kuko dufite gahunda itari iyo mu mwaka umwe,  bidukundiye twamuha imyaka 2 cyangwa 3 n’ubwo ubundi amasezerano yabaga ari umwaka umwe”.
Ikipe ya Kiyovu Sports yaba irimo kuvugana n’abandi batoza, ariko bakaba batifuza gutangaza amazina yabo kubera ko hari andi makipe yahita abatwara.
Muddy avuga ko umutoza bazumvikana bizaterwa na gahunda ndetse na politike yiyo kipe yo gukinisha abakinnyi bakiri bato b’Abanyarwanda.
ericnshimiyimana
Umuvugizi atangaza ko bazakorana n’umutoza bazumvikana ku bijyanye no kugura abakinnyi, bitandukanye no mu gihe cyashize bajyaga bashaka umutoza akaba ariwe ubishakira.
Eric yarangije amasezerano n’ikipe y’igihugu Amavubi y’umwaka umwe muri Mata uyu mwaka.
Nshimiyimana yatoje amakipe atandukanye kandi akomeye harimo APR FC, AS Kigali n’Isonga FC.
Ikinyamakuru cyagerageje kuvugana n’umutoza Eric Nshimiyimana, ariko ntiyaboneka ku murongo wa telefone.
Ikipe ya Kiyovu Sports yarangije shampiyona iri ku mwanya wa 5 n’amanota 41, kuri ubu iyo kipe igeze muri ½ cy’igikombe cy’Amahoro aho yatsinzwe umukino ubanza na APR FC 3-1.
Tanga igitekerezo na Facebook

Tanga igitekerezo