Niyonzima Haruna ntiyishimiye imyitwarire ya murumuna we Hakizimana Muadjiri

Kapiteni w’ikipe y’igihugu y’umupira w’amaguru mu Rwanda Amavubi Niyonzima Haruna yemeza ko ntacyo badakora ngo bakosore murumuna we Hakizimana Muadjiri ariko ko yanze akabananira.

Niyonzima Haruna ubu ari mu bakinnyi bacyee u Rwanda rufite bakina hanze  ndetse akanitwara neza aho akina muri Yanga Africa yo muri Tanzaniya.

Uyu mukinnyi afite murumuna we ukina muri shampiyona y’u Rwanda mu ikipe ya Mukura VS Hakizimana Muadjiri ndetse akanagira mwishywa we Bizimana Djihad ukina muri Rayon Sports.Haruna yemeza ko ashima uko mwishywa we Bizimana Djihad ari kwitwara neza akanemeza ko azamushakira ikipe hanze akajya gukina nk’uwabigize umwuga.

Haruna yemeza ko imyitwarire y’aba basore bombi itandukanye cyane, avuga ko ashimira mwishywa we uko akomeje kwitwara neza haba mu kibuga ndetse no hanze yacyo.

Yagizet ati :”Djihad ni umukinnyi mwiza nkunda, n’uko agira disipiline mu minsi iri imbere niwe mukinnyi wo hagati tuzaba dusigaranye. Gahunda yo kumujyana hanze mbifite mu bitekerezo kubera ko umupira we ntabwo nifuza ko warangirira aha cyangwa ngo ahatinde, kuko urabizi abanyarwanda iyo dutinze hano muraturambirwa, rimwe na rimwe muvuga ko twashaje kubera kutumenyera. Ariko iyo gahunda ndayifite kandi nzabimufashamo uko bizagenda kose, kuko ni umwana wa mushiki wanjye nanjye ni umwana wanjye, mwifuriza ibyiza buri gihe.”

harunamuh

Kapiteni w’amavubi Haruna avuga ko atahita atangaza igihe azajyanira Djihad gukina hanze, kuko ngo abona hari ibyo akibura kandi akeneye kubyigira mu Rwanda. Ati :”Ntabwo navuga ko ari vuba ahangaha kuko aracyari umwana, buriya no gukina umupira wabigize umwuga bisaba kuba hari ikintu umaze kugeraho. Akeneye gukina nk’undi mwaka umwe cyangwa ibiri hano mu Rwanda kugira ngo abone ubundi burambe. Kuko biragora iyo ujyanye umuntu ntakore ibyo washakaga birakubabaza nawe.

Gusa Haruna ibigwi avuga kuri mwishywa we sibyo avuga kuri Murumuna we Hakizimana Muadjiri, yemeza ko uyu musore yabananiye kandi ko ntacyo azigezaho agifite imyitwarire itari myiza.

 Haruna yagize ati :” Muadjiri inama ndazimugira buri gihe naba ndi ino cyangwa ndahari , ariko burya nkuko abantu babivuga, inda ibyara mweru na muhima. Uriya ni murumuna wanjye, ariko afite ukuntu ateye, nk’ubu iminsi maze ino, maze iminsi mugira inama, ariko uko ugiriye umuntu inama, siko azumva. Gusa ubu ni ubuzima turimo, nawe ari gukura, niba adashoboye guhindura ibitekerezo bye azabibona, natwe hari ibyo twabwirwaga na bakuru bacu kandi ubu turimo turabibona , ariko ntacyo twahinduraho kandi umupira arawuzi. Ariko ibintu byose burya udashyizemo disipiline ntacyo ugeraho, no mu mupira rero n’ubwo waba ur i Zidane ariko udafite disipiline ntacyo ugeraho.”

Uyu musore Muadjiri akunze kugarukwaho n’itangazamakuru ndetse n’ubuyobozi bw’ikipe ye ya Mukura ku myitwarire mibi irimo gutoroka ikipe nta ruhushya afite ndetse no kwanga gukora imyitozo nta mpamvu, ndetse yagiye anabizira kenshi agahagarikwa.

Uyu musore uretse kuvukana na kapiteni w’Amavubi Haruna Niyonzima, banafite mukuru wabo nawe wakiniye Amavubi iminsi myinshi Sibomana Abdul.

Tanga igitekerezo na Facebook

Tanga igitekerezo