Niteguye kwitwara neza mu cyiciro cya mbere mu Bubiligi – Nirisarike

Yanditswe na Admin ku wa 16.07.2015 saa 00:02 | Yasuwe : 1,274

Nirisarike Salamon ukinira ikipe ya  Saint Trond mu cyiciro cya mbere mu Bubiligi  atangaza ko bamaze iminsi bitegura shampiyona 2015-2016  akaba abona yiteguye kwitwara neza mu cyiciro cya mbere muri iki gihugu agiye gukinira bwa mbere.

Uyu myugariro usanzwe anakinira ikipe y’igihugu Amavubi,  nyuma y’imyaka 3 yari amaze akina mu gihugu cy’u Bubiligi ni ubwa mbere agiye gukina shampiyona y’icyiciro cya mbere.

Muri 2012-2014 yakiniye imyaka ibiri ikipe ya Antwerp FC mu cyiciro cya kabiri, umwaka ushize wa 2014 yavuye muri iyi kipe yerekeza muri Saint Trond nayo yo mu cyiciro cya  kabiri ariko uyu mwaka yazamutse mu cyiciro cya mbere.

Nirisarike-Salomon

Nyuma y’imyiteguro ikomeye yanabujije uyu mukinnyi gukina umukino Amavubi  yakinnye na Mozambique mu gushaka itike ya CAN 2017, Nirisarike Salomon yatangaje  ko ubu imyiteguro igenda neza kandi biteguye kwitwa neza mu cyiciro cya mbere. Yagize ati “ Turimo gukora cyane kuko shampiyona iratangira vuba aha, ndumva niteguye  kandi nizeye ko Imana izabana nanjye”. Shampiyona y’icyiciro cya mbere mu Bubiligi izatangira ku italiki 24 Nyakanga 2015.

Nirisarike wamaze imyaka ibiri muri Antwerp FC aho yakinnye imikino 44 agatsinda ibitego 3, muri Saint Trond, umwaka wa mbere ntabwo  byamugendekeye neza kuko yakinnye imikino 5.

Ku bijyanye n’umwanya wo gukina avuga ko ubu ashobora kubona umwanya wo gukina. Kandi ko kuba agiye gukina icyiciro cya mbere hari ibyo bizamufasha mu kongera urwego rwe rw’imikinire. Yagize ati “Gukina icyiciro cya mbere bizamfasha cyane kongera urwego rw’imikinire yanjye ndetse bizamfasha no  kwigararagaza  nkaba najya mu yandi makipe akomeye ku mugane w’u Burayi”.

Umukino wa mbere wa shampiyona y’icyiciro cya mbere mu Bubiligi uzahuza ikipe ya Saint Trond na  Club Brugge.

Tanga igitekerezo na Facebook

Tanga igitekerezo