Birori ,Elias Baby na Nirisarike ntibazakina na Congo

Yanditswe na Admin ku wa 01.08.2014 saa 08:27 | Yasuwe : 2,071

Ikipe y’igihugu Amavubi izakina na Congo Brazzaville kuri uyu wa gatandatu  idafite Uzamukunda Elias Baby, daddy Birori na Nirisarike Salomon bose bakina hanze y’u Rwanda.

Kuri rutahizamu Biroro Daddy wahawe ubwenegihugu  bw’u Rwanda ubu yibereye iwabo muri Congo i Kinshasa aho ari kumwe n’ikipe ye ya Vita Club nkuko yaraye abitangarije radiyo imwe ikorera hano mu Rwanda mu kiganiro bagiranye kuri telefone.Yavuze ko hari ibyo atarumvikana n’abayobozi b’umupira w’amaguru mu rwanda ariko ngo babikemuye yaza agakina.

daddybabysalomon

Mu kiganiro umutoza mukuru w’Amavubi Stephen Constantine yagiranye n’abanyamakuru kuri uyu wa gatatu yatangaje ko yatumiye myugariro Salomon Nirisarike na rutahizamu Uzamukunda Elias ngo baze gukinira ikipe y’igihugu Amavubi ariko bikarangira bataje ndetse batanavuze impamvu.

Yakomeje agira ati :“Navuganye na Elias ambwira ko ashaka kugaruka gukinira ikipe y’igihugu ndetse ko akunda u Rwanda yiteguye no gusaba imbabazi, nahise mubaza niba yadusanga muri Gabon ambwira ko bidashoboka mubaza igihe azagerera i Kigali ambwira ko ku wa kabiri azaba yaje ariko siko byagenze kuko kuri Elias amaze kubikora bwa kabiri kuva natangira gutoza u Rwanda

Kuri Nirisarike, uyu mutoza yavuze ko bandikiye ikipe ye ya Saint Trond  ndetse n’ishyirahamwe ry’umupira w’amaguru mu Bubiligi ariko Salomon Nirisarike ngo avuga ko atigeze abona iyo baruwa.Ibi ngo byatumye nawe ubwe bamwandikira, nyuma bamuhamagaye bamubaza  niba ibaruwa yayibonye asubiza ko azakubasubiza, nyuma bongeye kumuhamagara yanga kwitaba Telefone.

Umutoza Stephen Constantine avuga ko abona afite ikipe nziza kandi biteguye gutanga ibyo bafite byose ngo basezerere ikipe y’igihugu cya Congo Brazaville.Constantine ati “ntabwo twategeka abantu kuza gukinira ikipe y’igihugu cyabo ku ngufu kandi ikipe mfite ubu ndabona imeze neza ku buryo twiteguye gutanga icyo dufite cyose kugirango dusezere Congo.”

U Rwanda i Kigali rurasabwa gutsinda byibura ibitego biri hejuru ya bibiri rutinjijwe na kimwe kugirango rusezerere ikipe y’igihugu ya Congo Brazaville yabatsinze bibiri ku busa mu mukino ubanza i Pointe Noir.

Uyu mukino wo kwishyura uzakinwa kuri uyu wa gatandatu tariki ya 2 Kanama 2014, Congo izagera mu Rwanda kuwa kane nimugoroba.

Bari guhatanira kujya mu mikino y’igikombe cya Africa cy’ibihugu cya 2015 kizabera muri Maroc.

Salomon Nirisarike ni ubwa mbere avuzweho kwanga kuza gukinira ikipe y’igihugu nta bisobanuro bifatika atanze. Naho Baby we ubu si ubwa mbere.

Tanga igitekerezo na Facebook

Tanga igitekerezo