Ngomirakiza Hegman yasinyiye Police FC kuri Miliyoni 5

Yanditswe na Admin ku wa 16.07.2015 saa 22:10 | Yasuwe : 1,314

Umukinnyi Hegman Ngomirakiza wakiniraga ikipe y’ingabo z’igihugu APR FC yarangiye gusinya amasezerano y’imyaka ibiri muri Police FC .

Uyu mukinnyi akaba yitangariza ko mbere yari yunmvikanye n’ikipe ya Rayon Sports , ariko itinda kumuha amafaranga  birangira yifatiye aya Police FC.

Uyu musore wakinaga hagati mu ikipe ya APR FC, akaba yanifashishwa nk’umukinnyi ukina inyuma ya Rutahizamu, ngo yabonye Rayon Sports ikomeza kumutinza yigira muri Police FC.

Agira ati :” Ni byo rwose nari nunvikanye n’ikipe ya Rayon Sports, nziko ngiye no kuyerekezamo byarangiye, ikibazo kiba mu kunyishyura ibyo Twunvikanye. Rayon Sports nategereje ko ejo bampa amafaranga ni mugoroba ndaheba, bakomeza kumbwira ngo ntegereze gato. Mu gitondo hari uwangezeho, ambwira ko agiye kuyareba, ariko nkunva bafite indimi nyinshi, ntangira gucika intege, mbonye Police FC ikomeje kugaragaza ko inshaka, ni ko kuyerekezamo.Police FC yampaye miliyoni 5, ndunva nishimye, ngiye gushyiramo imbaraga, ndizera ko nzagirira akamaro iyi kipe.”

ngoma

Hegman wari umaze imyaka 8 muri APR FC.

Uyu musore akaba aje asanga abandi bakinnyi bo hagati bakomeye muri iyi kipe, nka Eric Ngendahimana, Imran Nshimiyimana, Mushimiyimana Mouhamed, Kalisa Rachid, Neza Anderson, n’abandi.

Ku ruhande rwa Rayon Sports, Aime Niyomusabye umuvugizi w’iyi kipe, yatangaje ko umutoza yababwiraga ko Hegman ni ubwo ari umukinnyi mwiza, atari we bakeneye cyane, babanza kumushakira Rutahizamu ukomeye.

Yagize ati : ” Ni umukinnyi mwiza twari twumvikanye byanarangiye, ariko umutoza aza kutubwira ko adakenewe cyane kuri ubu, tubivamo ibyo kumugura.” Niyomusabye Emmanuel.

Iyi kipe ya Police FC izakina irushanwa rya CAF Confederation umwaka utaha, nyuma yo kwegukana igikombe cy’Amahoro, itsinze Rayon Sports igitego 1-0 ku mukino wa nyuma.

Tanga igitekerezo na Facebook

Tanga igitekerezo