Ndoli na Regis bazagaruka mu kibuga nyuma y’amezi 6

Yanditswe na Admin ku wa 06.01.2015 saa 14:24 | Yasuwe : 972

Abazamu Ndoli Jean Claude w’APR n’ Amavubi na Ingabire Aimé-Regis  wa AS Kigali bagiye kumara  amezi atandatu badakina nyuma yo kuva muri Algeria kuvurwa.

Aba bakinnyi bageze mu Rwanda tariki ya 29 Ukuboza 2014 bavuye muri Algeria aho bari bamaze amezi abiri bakurikiranwa n’abaganga b’ikipe y’igihugu ya Algeria nyuma yo kubagwa mu kwezi kwa cumi.

Dr. Hakizimana Moussa umuvugizi w’ishyirahamwe ry’umupira w’amaguru mu Rwanda (FERWAFA) avuga ko aba bakinyi bazasubira mu kibuga nyuma y’amezi atandatu kuko kugeza ubu batakwizera ko bakize neza.

Yagize ati “aba bakinnyi tugiye gukomeza kubakurikirana kugira ngo babashe gukira neza kuko ubu bashobora gukora imyitozo yoroheje, ariko ntibatangira kujya mu makipe yabo kuko baba batarakomera neza”.Avuga ko nibura muri Mata ari bwo bashobora guha aba bakinnyi uburenganzira bwo kujya mu makipe yabo bagatangira gukoreramo imyitozo.

ndoliregis

Ndoli Jean Claude yavunitse ku wa 21 Nyakanga 2014 mu ivi, ku mukino wahuje Amavubi na Congo Brazaville. Aimé-Regis ni umuzamu w’ikipe ya As Kigali yavunitse tariki ya 29 Werurwe 2014 mu mukino wo kwishyura wabereye muri Maroc batsindwa na Difaa El Djadida yo muri Maroc ibitego 3-0.

Ishyirahamwe ry’Umupira w’Amaguru mu Rwanda Ferwafa ritangaza ko rikomeje gukurikirana aba banyezamu  kugirango bashobore gukira neza banagaruke mu kibuga vuba.

Nyuma yaho aba bakinnyi bavuye mu gihugu cya Algeria aho babazwe mu kwezi kwa cumi umwaka ushize, ubu barimo gukurikiranwa na Ferwafa.Muganga Patrick Rutamu ubakurikiranira hafi yagize ati, “Twatangiye gukurikirana aba bakinnyi. Aba bakinnyi mbafite kugeza mu kwezi kwa gatanu nyuma yaho nibwo bazashobora gusubira mu kibuga kandi nabwo bakora imyitozo yorohereje.Mu kwezi kwa karindwi, nibwo bazashobora gukora imyitozo ikomeye, bakanakina imikino igiye itandukanye,”

 

Tanga igitekerezo na Facebook

Tanga igitekerezo