Murenzi Abdallah aremeza ko ntacyamubuza kwiyamamariza kuyobora Ferwafa

Yanditswe na Rwanda Football ku wa 28.03.2017 saa 09:39 | Yasuwe : 62

Murenzi Abdallah azwi cyane kuba yari umuyobozi w’akarere ka Nyanza kateraga inkunga ikipe ya Rayon Sports ubwo yatwaraga igikombe cya shampiyona muri 2013.

Uyu mugabo washyizwe mu majwi  cyane ko ashobora kwiyamamariza kuyobora ishyirahamwe ry’umupira w’amaguru mu Rwanda (FERWAFA) aratangaza ko nta nzitizi zamubuza kwiyamamariza kuyobora iri shyirahamwe mu matora azaba muri Nzeli 2017.

Amategeko yemerera umuntu kwiyamamariza uyu mwanya ntiyavuzweho rumwe mu nama y’inteko rusange isanzwe yabereye i Rubavu taliki ya 25 Werurwe 2017, ariko byarangiye adahinduwe nubwo hari ababyifuzaga, aho bavugaga ko akumira abantu bakwifuza kwiyamamaza.

Aya mategeko avuga ko uwiyamamaza agomba kuba amaze imyaka itatu ari Perezida, Vice Perezida cyangwa umunyamabanga mu ikipe iri mu banyamuryango ba FERWAFA, kandi bikagaragara ko yasinye ku buzima gatozi bw’iyo kipe, akaba kandi afite imyaka 35 kuzamura.

Kuri iyi ngingo Murenzi Abdallah yavuze ko yabaye mu mupira igihe kirekire kuva muri Nyanza Fc ndetse na Rayon Sports Fc, kuyobora ataribyo yiga. Yagize ati” …njye nibaza ko kuyobora ntabwo ari ibintu umuntu yiga, yaba mu byerekeranye n’umupira, yaba mu byerekeranye n’ubuyobozi busanzwe, numva rero ibirebana na criteres(ibisabwa) biramutse bibaye ngombwa nta nzitizi yashobora kumpagararika, kuko yaba imyaka y’ubukure iyo ngiyo ndayirengeje, yaba imyaka yo kuyobora numva… nagiye nyobora ibyiciro bitandukanye by’umupira, Nyanza Fc , nyobora Rayon Sports, numva rero ibyo nta nzitizi irimo” Murenzi Abdallah.

Kuba ubuzima gatozi bwaratangiye kwakwa amakipe mu myaka ya vuba, nyuma y’aho Murenzi aviriye muri Nyanza Fc, hakwibazwa aho azakura icyangombwa yakwerekana, kigaragaza ko yayoboye ikipe byibuze imyaka itatu, dore ko Perezida wa FERWAFA, Nzamwita Vincent De Gaulle, yavuze ko bazareba ku buzima gatozi bw’ikipe ngo hatazagira ubabeshya.

Murenzi Abdallah avuga ko hari amasezerano agaragaza ko yayoboye Rayon Sports kuva igera i Nyanza muri 2012. Ati” nibaza yuko Rayon Sports igihe yamaze i Nyanza, benshi barayizi twari dufitanye amasezerano y’imyaka itatu, kuva mu 2012, 13 (2013), 14 (2014) kugera 15 (2015), iyo myaka yose yari i Nyanza rero ndumva nari mu buyobozi bwayo, yaba no mu byabanjeho, umupira nawubayemo igihe kinini, numva nta nzitizi irimo” Murenzi Abdallah.

Nubwo Murenzi Abdallah avuga ko nta nzitizi zamubuza kuziyamamariza kuyobora FERWAFA, anavuga ko hakiri kare, kuko atarafata umwanzuro ngo abe yatangaza niba aziyamamaza cyangwa azabireka.Ibyanditswe mu bitangazamakuru ngo byatumye abyibazaho byinshi n’impamvu yatumye byandikwa ndetse n’ibyo abantu babivugaho, byose ngo azabitekerezaho, afate umwanzuro nubwo hakiri kare.

Amatora y’uzayobora FERWAFA n’abo bazakorana azaba muri week-end ya kabiri y’ukwezi kwa nzeli nkuko byemejwe n’inama y’inteko rusange, hitabajwe amatora kuko hari abashakaga ko yaguma mu kwezi kwa Mutarama.

Tanga igitekerezo na Facebook

Tanga igitekerezo