Mukura yanganyije na Police iva ku mwanya wa nyuma

Yanditswe na Rwanda Football ku wa 09.11.2014 saa 21:55 | Yasuwe : 890

Nyuma y’ imikino itanu nta ntsinzi no kwirukana umutoza Kayiranga Baptista, Mukura VS yanganyije na Police FC  igitego 1-1 ku munsi wa karindwi wa shampiyona

Mukura VS yakinishije abakinnyi babiri yari itegereje Mugisho Mukeshe na Hakim Zaki bakina nka ba rutahizamu bari bategereje ibyangombwa bibakura muri Bukavu Dawa muri Repubulika Iharanira Demokarasi ya Congo.

Mbere yo kujya kuruhuka, Zaki yaboneye Mukura VS igitego nyuma y’aho myugariro wa Police FC, Twagizimana Fabrice atakaje umupira mu rubuga rwabo.

Mu gice cya kabiri, Mukura VS yabonye uburyo bukomeye bwo gutsinda igitego ariko Zagabe Jean Claude agiye kuwutera aragwa.Police FC yahise isimbuza Uwimana Jean d’Amaour na Ngendahimana Eric baha umwanya Habyarimana Innocent na Nshuti Idesbald wavuye muri Mukura VS agombora ku munota wa 84.

Kapiteni wa Police FC, Tuyisenge Jacques yaje kubona amahirwe akomeye yo kubona igitego ariko umupira yateye ukubita ku giti cy’izamu ujya hanze.

mukurapolice1415

Mukura VS yabone inota rya gatatu ku mukino wa karindwi, ihita va ku mwanya wa nyuma ku kinyurano cy’ibitego irusha Isonga FC.

Police FC inganyije imikino ine itsinda undi kuva ku mukino w’umunsi wa kabiri banyagira Kiyovu Sports ibitego 5-0, iri ku mwanya wa 6 n’amanota 10.

Kuri stade ya Kigali, AS Kigali yari yanganyije imikino itatu iheruka yatsinze Isonga ibitego 3-0 harimo bibiri bya Sugira Erneste na Bariyanga Hamdan bombi bahamagawe mu ikipe y’igihugu itegura umukino wa gicuti na Maroc tariki ya 14 Ugushyingo 2014.

Amagaju yanganyije na Marines kuri stade Umuganda afata umwanya wa gatanu nyuma ya Kiyovu Sports ifite 13 na AS Kigali ya kane ifite 12.

Shampiyona igiye guhagarara ibyumweru bibiri kubera ikipe y’igihugu igiye gutegura umukino wa gicuti na Maroc tariki ya 14 Ugushyingo 2014.

Tanga igitekerezo na Facebook

Tanga igitekerezo