Muhire Kevin wavuye mu Isonga birangiye agiye muri Rayon Sports

Yanditswe na Rwanda Football ku wa 15.07.2015 saa 13:20 | Yasuwe : 1,363

Kevin Muhire wakiniraga Isonga FC kuri uyu wa gatatu nibwo yasinye amasezerano y’imyaka ibiri yo gukinira ikipe ya Rayon Sports nk’uko byemezwa n’ubuyobozi bw’iyi kipe y’i Nyanza. Uyu musore yari yamaze kumvikana by’ibanze  na Police FC kuwa kabiri ariko batarasinya amasezerano nawe.

Nkuko twari twabibatangarije uyu mukinnyi yari yagiranye amasezerano y’ibanze ( pré-contrat ) na Police FC ariko yabaciye mu rihumye ysinyira imyaka ibiri muriRayon Sports.

Umuvugizi wa Rayon Sports yabwiye itangazamakuru  ko uyu mukinnyi nabo bari bamaze iminsi bamushaka, uyu munsi akaba aribwo bamusinyishije.

Amakuru atugeraho aravuga ko ikipe ya Rayon Sports yari yumvikanye n’abasore babiri bahoze bakinira Isonga Nshuti Dominique Savio na Muhire Kevin,ndetse bakayemerera kuyisinyira.Aba bakinnyi bombi bakaba bari bemerewe n’umwe mu bakunzi ba Rayon Sports guhita bishyurwa miliyoni ebyiri n’igice (2 500 000 Frw) ariko bagasinyira iyi kipe y’ i Nyanza.

Uyu musore ukina mu kibuga hagati ni umwe mu bigaragaje cyane mu ikipe y’Isonga, ndetse anatsinda igitego mu mukino ikipe y’igihugu y’u Rwanda yatsinze Somalia ibitego 2-0.

Muhire w’imyaka 19 bagenzi be bakunda kwita Rooney, yifuzwaga cyane kandi n’ikipe ya Police FC nubwo bwose itabashije kumusinyisha. Kuri uyu wa kabiri we na Police FC bari babashije kumvikana by’ibanze ariko ntiyahita asinya amasezerano.

Uyu musore asanze abandi bagenzi be bakinanaga mu Isonga FC barimo rutahizamu Dominic Savio Nshuti, Francois Hakizimana, Bonheur Hategekimana ukina mu izamu na Jean d’Amour Nzayisenga bita Meya bose bakinaga mu Isonga FC ubu basinye imyaka ibiri muri Rayon Sports.

kevinmuhire

Nyuma yo kuvugwa ho ko yaba yarasinyanye amasezerano y’ibanze n’ikipe ya Police Fc,umuvugizi w’iyi kipe CIP Mayira Jean de Dieu yatangaje ko batigeze bagirana amazsezerano nawe.Yagize ati : “Kevin afite ishuli ry’umupira yakuriyemo,ntabwo twajya gusinyisha umukinnyi bitanyuze mu nzira zemewe n’amategeko,gusa twari twamwifuje, twumvise ko yaba yagiye mu ikipe ya Rayon Sports kandi rwose twe ntacyo bidutwaye” CIP Mayira aganira na Kigali Today

Nkuko umutoza wa Police FC Cassa Mbungo yari yabitangaje yagize ati : “Turi mu biganiro kandi bigeze kure, turamwifuza kuko ni umukinnyi mwiza kandi ukiri muto, aje muri Police FC hari icyo yafasha. Ntabwo ari we wenyine twifuza hari n’abandi bakinnyi dushaka.”

Hari abandi basore baguzwe na  Police nka Anderson Neza, Robert Ndatimana, Muhammad Mushimiyimana, rutahizamu Danny Usengimana na Myugariro wo hagati Hakim Tuyisenge

Kugeza ubu Police FC yongereye bamwe mu bakinnyi amasezerano barimo umunyezamu Marcel Nzarora, Gabriel Mugabo, Fabrice Twagizimana, Imran Nshimiyimana na kapiteni Jacques Tuyisenge.

Ikipe ya Police FC yegukanye igikombe cy’Amahoro itsinze Rayon Sports ku mukino wa nyuma izahagararira u Rwanda mu gikombe cy’Afurika cy’amakipe yatwaye ibikombe iwayo.

Muri shampiyona yarangije ku mwanya wa gatatu n’amanota 46 nyuma yo gutakaza bamwe mu bakinnyi bayo bari bakomeye bagonzwe no kuba ari abanyamahanga mu mwaka washize wa shampiyona. Umwaka ushize ikaba yaregukanye umwanya wa gagatu muri Cecafa Kagame Cup bwa mbere yari ikinnye iri rushanwa.

Tanga igitekerezo na Facebook

Tanga igitekerezo