Migi ntazakinira APR FC umwaka utaha

Yanditswe na Rwanda Football ku wa 17.06.2015 saa 17:22 | Yasuwe : 1,277

Mugiraneza Jean Baptiste bakunda kwita Migi  umaze imyaka 8 akinira ikipe ya APR FC  yamaze gufata icyemezo cyo gusohoka muri iyi kipe ya gisilikare  akerekeza hanze y’u Rwanda gukomerezayo gukina ruhago.

Uyu musore uvuka ku Mumena, yakuriye mu makipe y’abato ya Kiyovu Sports, mbere yo kwerekeza muri La Jeunesse FC ikipe nshya yari imaze gushingwa ku Mumena mu ntangiriro ya za 2000 batozwa na Yves Rwasamanzi n’umutoza Kayiranga Jean Baptiste wari uhagaritse gukina mu ikipe ya Rayon Sports.

Iyi kipe yaje kuzamuka mu cyiciro cya mbere Migi arayikinira  kugeza ubwo yaje kugurwa na Kiyovu Sports akaba ariyo akomerezamo gukina ruhago.Migi yaje kubengukwa n’ikipe ya APR FC ayerekezamo mu mwaka w’i 2007. Kuva muri uyu mwaka wa 2007 kugeza na n’ubu aracyari umukinnyi w’ikipe ya APR FC nta yindi kipe yigeze akinira kugeza ubu .

Mugiraneza Jean Baptiste aganira n’ikinyamakuru  Ruhagoyacu kuri uyu wa kane yagize ati : ” Nishimiye igihe maze nkina hano mu Rwanda, natwaye ibikombe byinshi na APR FC ariko ubu harageze ko mva hano mu Rwanda nkajya gukina hanze y’u Rwanda.”

Uyu mukinnyi wo hagati w’ikipe ya APR FC, akaba n’umukinnyi w’ikipe y’igihugu Amavubi, akaba ari kwifuzwa n’amakipe y’ibigugu yo mu karere ka Africa y’iburasirazuba, ndetse no mu gihugu cya Turkey. Migi yatangaje ko atazongerara kugaragara muri shampiyona y’u Rwanda umwaka utaha w’imikino.

miggy

Azam FC yo mu gihugu cya Tanzania ni yo ihabwa amahirwe yo kuba yakwegukana uyu musore wo hagati nyuma yo kongera amadorali 500 ku yo ikipe ya GorMahia yo muri Kenya  yifuzaga kumuha ku mushahara we ndetse n’amafaranga imugura ari hejuru yayo iyi kipe yo muri Kenya imuha.Si aya makipe yonyine yifuza Mugiraneza Jean Baptiste kuko uwari umutoza we mu Rwanda Branco Tucak, yamuboneye ikipe ikomeye mu gihugu cya Turikiya ari na yo ifite amahirwe menshi yo kwegukana uyu mukinnyi wa APR FC .

Jean Baptiste Mugiraneza arasoza amasezerano ye muri APR FC uri uku kwezi kwa 7 akaba adateganya kuba yayongera, arifuza kujya gukomereza umupira we hanze y’u Rwanda.Mugiraneza Jean Baptiste yatwaye ibikombe 6 bya shampiyona, yegukana igikombe cy’Amahoro, inshuro 4, ndetse anahesha APR FC igikombe cya CECAFA Kagame Cup, inshuro 2 zose.

Mugiraneza Jean Baptiste arasoza imikino y’igikombe cy’Amahoro cya 2015 ndetse n’imikino ya CECAFA Kagame Cup izabera Tanzania, ashobora kuzayikina, mbere yo kwerekeza mu ikipe ye nshya.Migi abaye umwe mu bakinnyi benshi bavugwa ko bashobora gusohoka muri shampiyona y’u Rwanda uyu mwaka bakajya gukomereza ruhago yabo hanze y’u Rwand biganjemo abakinira APR FC.

Tanga igitekerezo na Facebook

Tanga igitekerezo