Mbaraga Jimmy azishyura Police FC ibihumbi 680

Yanditswe na Rwanda Football ku wa 15.11.2014 saa 20:16 | Yasuwe : 786

Umukinnyi Mbaraga Jimmy azishyura ikipe ya Police FC ibihumbi 680 by’amafaranga y’u Rwanda nyuma yo kuyitoroka akerekeza muri Repubulika Iharanira Demokarasi ya Congo.

Mbaraga Jimmy ni umukinnyi wa Police FC yamubuze nyuma yo gukina CECAFA Kagame Cup.Jean de Dieu Mayira umuvugizi wa Police FC, atangaza ko Mbaraga Jimmy agomba kwishyura ibihumbi 680 bamutanzeho nk’itike yamugaruye mu Rwanda avuye muri Congo.

Mayira yagize ati “yari yabuze uko ava Kinshasa nitwe twamwoherereje itike, ni amafaranga ibihumbi 680, twakoze inama nk’abantu bagize Komite, aradusobanurira tumubaza uko yagiye n’ibindi byose. Ni umuntu wari wamujyanye, kwanza twe twari tuzi ko ashaka kujya muri Afurika y’Epfo, ariko yari agiye kumujyana mu Busuwisi, ariko yamuriye n’amafaranga, bageze i Kinshansa aramukwepa na nimero ye ivaho”.

mbaraga

Jean de Dieu akomeza avuga ko aribwo yatangiye kubahamagara ababwira ibibazo yagize, nabo bashaka uko bamufasha.
Uwo mukinnyi yari yasabwe n’ikipe ye ya Police kuba yakwandika ibaruwa asobanura n’aho yari yaragiye kandi akavuga impamvu yatumye agenda n’uko byagenze byose kandi akaba agomba kwishyura amafaranga bamwoherereje.

Umuvugizi avuga ko ari ibyo bamubwiye ko agomba kwishyura, ariko akaba agomba kujya yishyura ayo mafaranga mu byiciro, bitewe n’uko atayabonera rimwe. Mayira avuga ko bafashe umwanya kuri uwo mukinnyi  bakamugira inama ko agomba kwirinda icyo kintu ntikizongere kubaho.

Mbaraga yaranditse asaba imbabazi Police FC nayo imwemerera ko yongera kujya mu bandi, ariko akishyura amafaranga y’urugendo bamwoherereje kugira ngo agaruke mu Rwanda.Mbaraga afitanye amasezerano na Police FC y’imyaka 2. Uyu mukinnyi yari yaravuye muri As Kigali muri uyu mwaka yerekeza muri Police FC.

Tanga igitekerezo na Facebook

Tanga igitekerezo