Masoudi yemeza ko Rayon Sports yakorera Rivers United ibyo FC Barcelone yakoreye PSG

Yanditswe na Rwanda Football ku wa 18.04.2017 saa 00:01 | Yasuwe : 74

Umutoza wa Rayon Sports, Masoudi Djuma yatangaje ko mu mukino batsinzwemo ibitego bibiri ku busa na Rivers United bashoboye kureba aho iyi kipe ikomeye ndetse n’aho ifite intege nke ku buryo bagiye kugaruka i Kigali gutegura umukino wo kwishyura hari icyizere cyo kuzayisezerera bakerekeza mu matsinda.

Rayon Sports kuri iki Cyumweru yatsinzwe ibitego 2-0 na Rivers United yo muri Nigeria bya Emeka Atuloma ku munota wa 29 na Guy Kuemian ku wa 51 byatumye amahirwe yayo yo kwerekeza mu matsinda ya CAF Confederation Cup agabanuka.

Gusa, Masoudi yatangaje ko hakiri indi minota 90 izakinirwa i Kigali, imbere y’abafana ishobora gufasha iyi kipe ikomoka i Nyanza kuba iya mbere yo mu Rwanda yanditse amateka yo kujya mu matsinda y’iri rushanwa.

Irambona Msudi Djuma utoza Rayon Sports

Yagize ati “Tumaze gutsindwa 2-0 ariko imikino nk’iyi ni iminota 180, 90 yo muri Nigeria twayitakaje. Nk’umutoza ndabyemera ariko ni umupira w’amaguru. Hasigaye iy’iwacu, tugiye gutegura umukino turebe ko twabona itike kuko Rivers twayibonye uko ikina, aho ikomeye n’aho ifite imbaraga nke.

Abajijwe aho akura icyizere cyo kuba Rayon Sports yatsinda ibitego bibiri ikabona n’icya gatatu cyatuma ikomeza, Masoudi yatanze urugero rw’ibiherutse gukorwa na FC Barcelona muri UEFA Champions League mu kwezi gushize itsindwa 4-0 na Paris Saint-Germain mu Bufaransa yagera muri Espange ikabyishyura ikabona n’icya gatandatu avuga ko na we ikipe ye yabikora.

Ati “Nakinnye umupira, nta mukino usa n’undi ntibibaho. Uyu munsi ushobora gutsindwa 5-0 ariko ejo ugatsinda ibirenze ibyo. Twatsinzwe hano ariko sinzi uko bizagenda i Kigali, umupira w’amaguru ugira ibyawo.”

Masoudi yanavuze ko atishimiye imisifurire y’uyu mukino ndetse ngo akaba yari yabibonye mbere ko bitaza kuba byiza ubwo Rivers United yangaga ko hari umunyamakuru wo mu Rwanda winjiza camera ku kibuga ngo afate amashusho y’umukino gusa na we akavuga ko bazategura uko bashoboye i Kigali.

Mu mukino wo kwishyura Rayon Sports izaba yagaruye myugariro Ange Mutsinzi Jimmy wari ufite ikarita itukura yahawe ku mukino wo kwishyura wa Al Wau Salaam byatumye asiba imikino ibiri irimo uwa Onze Createur n’uyu wa Rivers United.

Uyu mukino uteganyijwe ku wa Gatandatu tariki 22 Mata kuri Stade Amahoro, Rayon Sports ikaba isabwa gutsinda ibitego 3-0 kugira ngo ibone itike yo kujya mu matsinda ndetse ikaba yahita inahabwa akayabo k’amadorali ya Amerika ibihumbi 275 arenga gato miliyoni 222 mu mafaranga y’u Rwanda.

Tanga igitekerezo na Facebook

Tanga igitekerezo