Liverpool irashaka kwandika amateka igaca kuri Man City ku munsi wa nyuma

Yanditswe na Rwanda Football ku wa 12.05.2019 saa 08:46

Liverpool irashaka kwandika amateka yo kuba ikipe ya mbere ihigitse iya mbere ku rutonde rw’agateganyo rwa shampiyona ya Premier League ikayikura ku mwanya wa mbere ku munsi wa nyuma, mu gihe iri guhatanira igikombe na Manchester City.

Liverpool iza kwakira Wolves mu mukino uba kuri icyi cyumweru, irushwa inota rimwe na Manchester City ifite igikombe cya shampiyona cyo mu mwaka ushize w’imikino. Iyi Manchester City yo iraza kuba ikina na Brighton ku kibuga cya Brighton.

Uku guhatanira igikombe cya shampiyona kugera ku munsi wa nyuma kubaye ukwa munani kubayeho mu mateka ya Premier League.Liverpool iherutse kubona itike yo gukina umukino wa nyuma wa Champions League ihigitse Barcelone, ntabwo irongera kwegukana igikombe cya shampiyona guhera mu mwaka wa 1990.

Kwabaye uguhatana ko ku rwego rwo hejuru, City itsinda imikino yayo 13 iheruka gukina naho Liverpool itsinda imikino umunani yikurikiranya. Nta kipe n’imwe muri izi iratsindwa umukino wa shampiyona guhera mu kwezi kwa mbere uyu mwaka.

City kuri ubu ifite amanota 95 mu gihe Liverpool ifite amanota 94, bivuze ko ikipe iyo ari yo yose muri izi zombi irangiza iri ku mwanya wa kabiri iba iya kabiri ya mbere igize amanota menshi cyane mu mateka y’iyi shampiyona.

Imibare igaragaza iki ?

Mu mibare, Liverpool irasabwa gutsinda Wolves iri ku mwanya wa karindwi ku rutonde rw’agateganyo rwa shampiyona ndetse ikizera ko City itakaza amanota mu mukino uyihuza na Brighton iri ku mwanya wa 17.

Liverpool irakina uyu mukino wo kuri iki cyumweru yifitiye icyizere cyinshi nyuma yo kugera ku mukino wa nyuma wa Champions League itunguye Barcelone ikayitsinda ibitego 4-0 mu mukino wo kwishyura wabaye ku wa kabiri w’iki cyumweru, mu gihe Barcelone yari yayitsinze ibitego 3-0 mu mukino wabanje.

Iyi Liverpool izahura na Tottenham mu mukino wa nyuma wa Champions League uzaba ku itariki ya mbere y’ukwezi gutaha kwa gatandatu, ukabera i Madrid muri Espanye.

Umutoza Jurgen Klopp yagize ati: “Turatekereza ku mukino wa Wolves… Ntabwo bigabanya igikorwa gikomeye twagezeho ku wa kabiri. Ni ukuri cyabaye kimwe mu bihe byiza cyane bibayeho mu mupira w’amaguru, atari kuri Liverpool gusa.Ariko ibyo ntacyo bivuze kuri uyu mukino wo mu mpera y’icyumweru, usibye ko dukwiye kwigirira icyizere“.

City yo iri gushaka kuba ikipe ya mbere yanditse amateka yo gutsindira ibikombe bitatu byo mu Bwongereza icyarimwe. Iyi kipe itozwa na Pep Guardiola yatsinze Chelsea kuri za penaliti yegukana igikombe cya Carabao. Ku wa gatandatu izakina na Watford ku mukino wa nyuma wa FA Cup.

Mu kwezi gushize kwa kane, umutoza Guardiola yavuze ko Liverpool yatumye habaho guhatana gukomeye uyu mwaka.Yagize ati: “Amakipe yombi [Manchester City na Liverpool] akwiye igikombe, ariko imwe yonyine ni yo ishobora kugitwara.Ikipe itazatwara igikombe ntabwo ishobora kwicuza kuko yitanze bishoboka byose“.

Tanga igitekerezo