Leta yageneye CHAN miliyari 5.2

Leta y’u Rwanda yateganyije miliyari 5.2 z’amafaranga y’u Rwanda azifashishwa mu kubaka ibibuga bizakinirwaho imikino y’igikombe cya Afurika mu mupira w’amaguru ku bakina muri shampiyona z’ibihugu byabo.U Rwanda ruzakira igikombe cya Afurika ku bakinnyi bakina ku mugabane wa Afurika (CHAN 2016), giteganyijwe kuva tariki 16 Mutarama kugeza tariki 7 Gashyantare 2016.Inteko Ishinga Amategeko y’u Rwanda yemeje mu mpera z’icyumweru gishize ingengo y’imali ya Leta y’umwaka wa 2015/16 ingana n’amafaranga y’u Rwanda miliyari 1,768.2.

Minisitiri w’Imali n’Igenamigambi, Amb. Gatete Claver yavuze ko muri ayo mafaranga harimo miliyari 5.2 yagenewe umushinga wo kubaka ibibuga bizakira imikino y’igikombe cya Afurika ku bakinnyi bakina muri shampiyona z’ibihugu byabo (CHAN 2016).

 Huye-Stadium
Sitade Huye imwe mu zizakira CHAN 2016

Aya mafaranga ni azakoreshwa mu bikorwa remezo gusa, mu gutunganya ibibuga no mu mirimo yo kubisana kugira ngo byuzuze ibisabwa n’Ishyirahamwe Mpuzamahanga ry’Umupira w’Amaguru ku Isi (FIFA).

Biteganyijwe ko ibibuga bya Stade Amahoro, Stade ya Kigali iri i Nyamirambo, Stade Umuganda y’i Rubavu ndetse na Stade Huye ari zo zizakira imikino y’iri rushanwa, naho ikibuga cya FERWAFA n’ikindi bifatanye kiri kuvugururwa, ikibuga cya Stade Mumena n’icyo ku Kicukiro hamwe n’ibindi bikazifashishwa mu myitozo.

Mu gihe hasigaye gusa amezi 6 ngo iri rushanwa ritangire, imirimo yo kubaka bimwe mu bibuga no gusana bimwe yagaragayeho gutinda nk’uko abagenzuzi b’Ishyirahamwe ry’Umupira w’Amaguru ku Mugabane wa Afurika (CAF) baheruka mu Rwanda mu kwezi gushize babitangaje.

Aba bagenzuzi ba CAF basabye ko amasitade azakira CHAN ashyirwamo intebe zigezweho kandi akaba yabonetse bitarenze Kanama uyu mwaka.

Minisiteri y’ Umuco na Siporo yo yasobanuye ko iby’ingezi byamaze gutungana ibindi bikaba ari ibyifuzo kandi bakaba bagomba kubiganiraho, bagafatira imyanzuro hamwe.

Tanga igitekerezo na Facebook

Tanga igitekerezo