Kwizera Olivier ni we nzasigira umwanya mu ikipe y’igihugu-Ndoli Jean Claude

Umunyezamu wa AS Kigali n’ikipe y’igihugu “Amavubi” Ndoli Jean Claude,  arahamya ko Kwizera Olivier ari we munyezamu yakwifuza kubona asigara mu izamu ry’ikipe y’igihugu “Amavubi” cyane ko abasigaye bose abarusha.

Ndoli yahoze ari umunyezamu wa mbere mu ikipe y’igihugu kuva muri 2007 akajya asimburana na Ndayishimiye Eric “Bakame” wabanje gukina muri ATRACO FC nyuma amusanga muri APR FC bombi bagahamagarwa bava mu ikipe imwe.

Ahagana mu 2013 haje kwiyongeraho Kwizera Olivier, umusore wari ukibyiruka, azana ubuhanga budasanzwe; abanza kwicaza Ndoli muri APR FC no mu ikipe y’igihugu asigara ahanganiye umwanya na Bakame.Kwizera wagaragaraga nk’uzasimbura aba banyezamu yaje kurangwa n’imyitwarire mibi irimo kwandika amagambo atari meza ku mbuga nkoranyambaga agaragaza ko atishimiye abamuvugiriza induru ngo yakoze amakosa mu Mavubi aho yatangiye kubagereranya n’imbwa zimoka zidafite icyo zatwara umuntu n’ibindi.

Kwizera Olivier usanzwe ari umunyezamu w’ikipe y’igihugu Amavubi

Kwizera yanagiranye ikibazo na APR FC bizamuwe n’uko hari ikipe yamwifuzaga yo muri Afrika y’Epfo, abayobozi ba APR FC bamuhimisha kumuhagarika ajya muri Bugesera FC.Ndoli Jean Claude babanye muri APR FC mu gihe cy’imyaka 3 avuga ko Kwizera yabonye isomo rikomeye ry’ubuzima. Yagize ati ’’Kwizera ni umunyezamu ufite impano zose zishoboka usibye ko yaburaga akantu kamwe ko gutekereza icyo ari cyo n’icyo yifuza kugeraho, maze minsi nkurikirana amakuru ariko nabonye ko yisubiyeho. Byose byari ubwana’’.

Ndoli Jean Claude yerekana ko Kwizera ari umunyezamu ntagereranywa ufite impano zirimo izo gufata umupira, kuwutanga no guhangana. Ati ’’Icya mbere ni umuntu utagira ubwoba, ni wa muntu ufite umutima wo guhangana kandi ku munyezamu icyo ni cyo cya mbere. Icya kabiri azi gufata umupira akanaba ntagereranwa mu kurenza ya mashoti aremereye. Ikindi gikomeye ni umuntu uzi kurengura umupira (Degagement de la balle).Muri make afite byose ’’.

Ndoli urimo guteganya gusezera mu myaka ibiri, avuga ko Kwizera ari we ukwiye gusigarana inshingano zo kuba umunyezamu wa mbere w’ikipe y’igihugu. Ati ’’Bamugirire imbabazi agaruke mu ikipe y’igihugu kuko nta wundi muntu nasigaho atari Kwizera Olivier nkurikije uko narebye abandi bose, nta wundi nasigira ubushobozi nari mfite atari Kwizera Olivier’’.

Ndoli agira inama uyu musore yo kuva muri Bugesera FC akajya mu ikipe iri mu za mbere zizamufasha kuzamuka. Ati  ’’Umukinnyi uwo ari we wese yifuza kuba mu ikipe itwara ibikombe. Nk’inama namugira n’iyo atajya muri APR FC cyangwa Rayon Sports ariko nibura yakwegera aho hafi mu makipe ya mbere ku buryo haje nushaka abakinnyi ashobora guhita amutwara’’.

Kwizera Olivier yazamukiye mu Isonga FC nyuma ajya muri APR FC kuva muri 2016 akaba akinira ikipe ya Bugesera FC.

Tanga igitekerezo na Facebook

Tanga igitekerezo