kuki ikiganiro cy’imikino ku Isango cyahagaritswe ku wa gatandatu?

Yanditswe na Admin ku wa 21.09.2014 saa 12:40 | Yasuwe : 1,276

Umuyobozi mukuru wa Radio Isango Stars aratangaza ko ari we ubwe wifatiye icyemezo cyo guhagarika ikiganiro cya Sports cyo kuwa gatandatu tariki ya 20 Nzeri 2014.

Muri icyi kiganiro cyahise kuri uyu wa gatandatu tariki ya 20 Nzeri 2014 abanyamakuru bakora icyo kiganiro bari batumiye Ngarambe Alfred ngo atange ubuhamya ku bibera muri FERWAFA nyuma yo kuyirukanwamo ayikoreye imyaka 7.

Icyo kiganiro cya Sports cya mu gitondoubundi gitangira saa tatu cyahagaritswe kimaze iminota 28 yonyine, gihagarikwa Ngarambe Alfred wahoze ari umukozi muri FERWAFA akaza kwirukanwa, arimo gusobanura uburyo yirukanywemo.

Kuba ikiganiro cyarahagaritswe mu buryo butunguranye ndetse nta n’integuza, nyuma y’igihe gito Radio igakomeza hashyirwamo indirimbo zitandukanye, byatumye hatangira guhwihwiswa ko hari ubutumwa bugufi bwohererejwe ubuyobozi bwa Radio Isango Star butegeka guhagarika icyo kiganiro, uretse ko hatagaragazwa neza aho bwari buturutse.

Aganira n’ikinyamakuru www.umuryango.rw dukesha iyi nkuru, Mugabo Justin Umuyobozi mukuru akaba na nyiri Radio Isango Star yatangaje ko ari we wifatiye icyemezo cyo guhagarika icyo kiganiro, abitewe n’uko yumvaga kidakoranywe ubunyamwuga.

Mugabo yagize ati : “Ni jye wifatiye icyemezo cyo kugihagarika, ntago ari FERWAFA cyangwa undi wese nk’uko byavugwaga. Jye numvise cyari ikiganiro kidakoranywe ubunyamwuga. Numvise umuntu atangiye gusebya undi, numva atangiye kuvuga uburyo yirukanywe, numva byakururura umwuka mubi hagati y’uvuga, uvugwa, ikigo bakoreraga ndetse n’Igitangazamakuru cyacu kandi cyari gisanzwe cyizeweho ubunyamwuga.”

Mugabo yakomeje avuga ko kuba uwo muntu yakwirukanwa muri FERWAFA ubwa byo atari inkuru ku buryo yahabwa umwanya kuri Radio Isango Star ngo asobanure uburyo yirukanywe, cyane ko ibyo bidakorerwa abandi bakozi bose birukanywe mu bigo bitandukanye, ahubwo agasanga icyari kuba inkuru ari uko FERWAFA yaba yavuyeho yose.

isangosports1

N’ubwo nta cyo ubuyobozi bwa Radio Isango Star bwari bwatangariza abanyamakuru babiri Nkusi Denis na Azakorishaka Jean Damascene bari batumiye Ngarambe Alfred mu kiganiro, birashoboka ko baba birukanywe ku kazi nk’uko bikomeje kuvugwa.

Gusa nk’uko na bo babihamya, ngo ubwo Umuyobozi yamaraga gutanga itegeko ko ikiganiro gihagarikwa nta nteguza, Umuyobozi w’ishami ry’amakuru (Chef Editor) yahise aza abasaba gusohoka bakitahira ngo kuko ikiganiro cya bo kitaza gukomeza.

Abanyamakuru bari bateguye icyo kiganiro bo bavuga ko uburyo Umuyobozi wa Radio avuga bwo kugitegura butashobokaga, kuko byashobokaga ko inzego zivugwa muri iki kibazo (Ngarambe Alfred, Mukandanga Kelly na FERWAFA) bitari byoroshye ko bahurira muri Studio, bityo bahitamo gushaka kugaragaza ibibazo, hanyuma uwo bikoze ku mutima na we akaba yasaba umwanya akagira icyo avuga.

Abo banyamakuru bakomeza bavuga kandi ko batari batumiye Ngarambe ngo ababwire iby’ubuzima bwe bwite cyangwa ibibazo yagiranye na Mukandanga, ko ahubwo bari bamutumiye ngo ababwire byinshi azi bitagenda neza nk’umuntu umaze imyaka 7 muri FERWAFA, ababwire ku bibazo by’abakinnyi bakomoka hanze y’u Rwanda banze gukinira Amavubi nka Mbuyu Twite, ndetse n’uburyo abandi bagiye bahabwa amazina n’ibyangombwa ngo bakinire u Rwanda, n’ibindi.

Abahagarariye Itangazamakuru mu Rwanda bo babivugaho iki ?

Ishyirahamwe ry’Abanyamakuru mu Rwanda mu ijwi rya Gonzaga Muganwa Umunyamabanga Nshingwabikorwa, ryemeza ko nta kubangamira ubwisanzure bw’abo banyamakuru bari bateguye ikiganiro nk’uko bamwe babihwihwisaga, kuko Umuyobozi wa Radio Isango Star yari afite uburenganzira bwo guhagarika icyo kiganiro mu gihe yumvaga kidakurikije amahame agenga itangazamakuru ry’umwuga mu Rwanda.

Gonzaga akomeza avuga ko byajyaga kuba bibi mu gihe icyo kiganiro cyaba cyarahagaritswe bitegetswe n’urundi rwego ruri hanze y’ubuyozi bwa Radio.

Ikiganiro cyahagaritswe Ngarambe Alfred amaze gusobanura imiterere y’ikibazo yagiranye na Mukandanga Kelly

Abajijwe Mukandanga Kelly bagiranye ikibazo n’ububasha afite mu kuba yamwirukanisha, Ngarambe yagize ati : “Uwo mugore Mukandanga Kelly jye muzi ari umunyamabanga mu biro by’Ubunyamabanga bukuru bwa FERWAFA, ariko nyuma naje kumva bavuga ko ari we ushinzwe Human Ressource (ushinzwe abakozi), ariko ibyo ntabyo twigeze tubwirwa,..”

Asobanura imiterere y’ikibazo yagiranye na Mukandanga Kelly, Ngarambe yagize ati : “Hari ku mukino wahuje APR FC na Athletico y’i Burundi mu mikino ya CECAFA Kagame Cup 2014, maze umudamu dukorana antira imodoka ngo ajye konsa, maze njya kumurebera umushoferi witwa Nyiyibizi.

Ngiye kwinjira muri salle ya VIP (mu ruganiriro rw’abanyacyubahiro) aho bari bicaye, uwo mugore anyirukana mu buryo nabonaga yashakaga kuntesha agaciro ambwira ngo ‘Nsohoke muri iyi nzu, nsa n’uwikanga….”

Source: umuryango.rw

Tanga igitekerezo na Facebook

Tanga igitekerezo