Ku munsi wa gatanu wa shampiyona APR FC iyoboye urutonde

Yanditswe na Admin ku wa 02.11.2014 saa 23:37 | Yasuwe : 922

Imikino yo ku munsi wa gatanu wa shampiyona yakinwaga mu mpera z’icyi cyumweru isize APR FC yicaye ku ntebe y’icyubahiro ubwo yamaraga gutsinda mukeba Rayon Sports 2-1 kuri Stade Amahoro i Remera

Nubwo umukino wari wimuriwe amasaha ya nijoro (18h00) kubera shampiyona yo mu bwongereza , ntibyabujije abakunzi b’aya makipe akunzwe cyane mu Rwanda kwitabira ari benshi uyu mukino nkuko bisanzwe bigenda.

Aya makipe kandi yatangiye anganya amanota (10) ku buryo buri imwe yifuzaga gutsinda uyu mukino ngo ishyiremo icyinyuranyo cy’amanota atatu.

Umukino watangiranye ingufu nyinsi ku buryo ku munota wa kabiri APR FC yari yarangije kubona igitego cyayo cya mbere ku mupira waturutse muri corner utewe na Jamal Mwiseneza ( wavuye muri Rayon Sports ) ugasanga Nshutinamagara Ismael Kodo wahise agishyiramo n’umutwe.

Igice cya mbere APR FC yarushije Rayon Sports kugumana umupira no gusatira muri rusange bigaragara ko amakipe yahise afungura umukino hakiri kare ashyiramo ingufu n’ishyaka ba rutahizamu bahusha uburyo bukomeye , bituma unogera ijisho abakunzi benshi bari bawitabiriye.

Icyagaragaye ariko nuko mu busatirizi bwa Rayon Sports nta ngufu zari zirimo kuko Peter Otema atabonaga imipira na busa bityo umutoza Sostène avanamo Lomami Franck utagaragaye muri uyu mukino amusimbuza Muganza Isaac.

Rayon Sports nayo ntiyarebereye kuko yabonye amahirwe macye ariko ntihagire ikivamo, igice cya mbere kirangira  ari kimwe cya APR ku busa bwa Rayon Sports .

Mu gice cya kabiri hagaragaye gusatirana gukomeye ku mpande zombi umukino urangwa n’ishyaka n’ingufu kurusha ubuhanga.Nubwo bari batsinzwe ariko bafana ba Rayon Sports ntibacitse intege bakomeje gufana  cyane.

Ntibyatinze ariko uwo murindi wabo  ugabanurwa n’igitego cyatsinzwe na Sibomana Patrick ku munota wa 57 w’umukino.Mu kibuga ariko ho abakinnyi bakomeje gushakisha barimo Isaac Muganza, Fuadi Ndayisenga na Peter Otema bageragezaga gusatira ngo batsinde ibitego bigera aho  Peter Otema uri kwitwara neza muri iki gihe atsindiye igitego n’umutwe ku munota wa 74.

rayonapr1415u

APR FC yahise ifunga biha umwanya  Rayon Sports wo gusatira, umukino uragorana biza kugera naho jaza kubamo n’amahane.

APR yakomeje kuryama ku bitego byayo bibiri, Rayon Sports irasatira ngo yishyure biranga kugeza umukino urangiye, byahise biha APR FC kuyobora urutonde rw’agateganyo n’amanota 13 mu gihe Rayon Sports  iza ku mwanya wa kabiri n’amanota 10.

Umutoza w’ungirije wa APR, Vincent Mashami yagize ati, “Ndashimira abakinyi uburyo babyitwayemo neza. Twakinye neza kurusha uko twari twitwaye ku mukino wa Marines. Amahirwe twabonye twayakoresheje neza, ibi birakomeza kuduha ingufu muri gahunda yacu yo kongera kwegukana iki gikombe,”

Umutoza wa Rayon Sports Sostène Habimana  yagize ati : “Twakoze ibishoboka byose ngo tube twakwishyura ariko nibyashobotse. Tugomba kwigira ku makosa yabaye, tuga tegura umukino ukurikira.”

Ejo hashize ku wa gatandatu nibwo indi mukino yari yabaye aho ikipe ya Marines FC yabonye intsinzi yayo ya mbere nyuma yo gutsinda Police Fc ibitego 3-1.Betrand Mugenzi yatsinze ibitego bibiri maze Haruna Muvunyi atsinda icya gatatu mu gihe Imran Nshimiyimana yashoboye gutsinda igitego kimwe cy’ikipe ya Police FC mu mukino wabereye i Rubavu kuri Sitade Umuganda.Intsinzi ya Marines Fc yayifashije kuzamuka ku rutonde rwa shampiyona, dore ko ubu iri ku mwanya wa 12 n’amanota 4 mu mukino itanu.

Police Fc yatunguwe na Marines yo yamanutse ku mwanya wa 4 aho inganya amanota umunani na AS Kigali ndetse na Musanze.AS Kigali yagabanye amanota na Mukura VS nyuma yaho amakipe adashoboye kureba mw’izamu(o-0) naho Musanze Fc ibifashijwemo na Jean Shyaka yashoboye gutsinda Gicumbi iwayo igitego 1-0.

Mu yindi mikino, Kiyovu Sports yanganyije n’ikipe y’Isonga igitego 1-1 ku Mumena. Baby Miamyi Mbakiye yatsinze igitego cya Kiyovu Sports hanyuma Danny Usengimana gutsinda igitego cyo kunganya.

I Rwamagana, Amagaju yatsinze Sunrise ibitego 2-1 maze ihita izamuka ku mwanya wa gatatu n’amanota 9. Adolphe Hakundukize na Joachin Alanga nibo batsinze ibitego bya Amagaju Fc hanyuma Jean d’Amour Bunani atsinda igitego cya Sunrise Fc.

I Rusizi, Jean Bosco Harorimana yatsinze penaliti yafashije Etincelles gutsinda Espoir igitego 1-0.

Uko imikino y’umunsi wa 5 yose yarangiye :

Kuwa Gatandatu, 01.11.2014

AS Kigali 0-0 Mukura

Espoir 0-1 Etincelles

SC Kiyovu 1-1 Isonga

Gicumbi 0-1 Musanze

Sunrise 1-2 Amagaju

Marines 3-1 Police

Ku Cyumweru, 02/11/2014

APR 2-1 Rayon Sports

Shampiyona irakomeza kuwa kabiri no kuwa gatatu n’umunsi wa gatatu mu buryo bukurikira :

Kuwa Kabiri, 04.11.2014

Mukura vs Marines (Mumena)

Amagaju vs AS Kigali (Nyamagabe)

Isonga vs Sunrise (Kicukiro)

Kuwa Gatatu, 05.11.2014

Police vs APR (Kicukiro)

Musanze vs SC Kiyovu (Musanze)

Etincelles vs Gicumbi (Umuganda)

Rayon Sports vs Espoir (Regional)

Tanga igitekerezo na Facebook

Tanga igitekerezo