Kiyovu Sports yasinyishije umutoza mushya uturutse muri Nigeria

Yanditswe na Admin ku wa 12.08.2015 saa 11:53 | Yasuwe : 1,154
Umutoza Samuel Amamba ukomoka muri  Nigeria yamaze gusinya amasezerano yo gutoza ikipe ya Kiyovu Sports mu gihe kingana n’umwaka umwe.
Samuel Amamba uje gutoza mu Rwanda, avuga ko aka karere asanzwe akazi. Ati :  “ntabwo ndi umushyitsi mu Rwanda kuko muri 2006 nakinaga muri Uganda, mu Rwanda rero nsanzwe mpazi.”
Yavuze ko aje gutoza Kiyovu avuye muri Sudani y’Epfo aho yari amaze imyaka ibiri atoza ikipe ya Al-Merrekh-Juba  yo muri icyo gihugu.
amambaamamba
Abajijwe ikintu yaba yishimira yagezeho mu mitoreze ye Samuel Amamba yavuze ko ubu yavuye mu ikipe yatozaga yaregukanye umwanya wa Kane muri shampiyona y’iki gihugu.Nubwo nta byinshi yavuze ku ikpe ya Kiyovu Sports yari aje bwa mbere kureba aho yitoreza,  Samuel yavuze ko yabonye abakinnyi KIYOVU ifite  harimo  abeza n’abandi yabonye bari hasi , gusa yijeje ko hari byinshi byo gukora.
Ati ” ibyo kugura abakinnyi bashya byo ntacyo mbivugaho. Nzakoresha aba banyeretse ,nabonye harimo abeza ariko bafite byinshi byo guhindura.”
Uyu mutoza wavuze ko amaze imyaka itandatu muri uyu mwuga avuga ko afite icyizere ko Ikipe ya Kiyovu izagera kure. Ati ” buriya kugira ibyo wizeza bigendana n’uko watangiye imirimo yo gutoza, ubu rero ndi kwitegereza ariko hari icyizere kuko gutoza bisaba ibintu byinshi.
Abayobozi ba Kiyovu Sports bo bavuga ko nta mpungenge bafite ku buzima bw’ikipe ya  Kiyovu kuko bamaze kwemeza ko ingengo y’Imari iyi kipe izakoresha igera kuri miliyoni 147.  Bavuga ko Miliyoni 36 zirenga bazazifashisha mu kugura abakinnyi bashya, bityo bakabishingiraho bavuga ko kuba umutoza abonetse bagiye kunoza utundi tukibura.
Uyu mutoza Samuel Amamba aje asimbura umutoza Ally Bizimungu watozaga Kiyovu sports muri Shampiyona 2014-2015 ubu wamaze kwerekeza mu ikipe ya Bugesera FC.Samuel Amamba aje muri Kiyovu nyuma y’uko yari yagerageje  kugura umutoza wa Gicumbi FC  Ruremesha Emmanuel ariko abakavuga ko hajemo amananiza kuko Ruremesha yari yarongereye amasezerano bakabona bizabagora.
Nk’uko umuyobozi wa Kiyovu Sports abivuga ngo Samuel Amamba azatoza umukino we wa mbere muri Kiyovu Sports mu mpera z’iki cyumweru  mu irushanwa ry’igikombe cy’ AGACIRO. Biteganyijwe ko Kiyovu Sports izakina na Sunrise FC.
Tanga igitekerezo na Facebook

Tanga igitekerezo