Kiyovu na Marines FC zicunze nabi zaherekeza Pepiniere mu cyiciro cya kabiri

Yanditswe na Admin ku wa 06.04.2017 saa 21:16 | Yasuwe : 17

Shampiyona y’umupira w’amaguru ya 2016-2017 isigaje imikino 8 ihwanye n’amanota 24 ku makipe yose. Rayon Sports ni yo ikomeje kuyobora urutonde ndetse irahabwa amahirwe menshi yo gutwara igikombe cy’uyu mwaka.

Hagomba kuboneka amakipe abiri azamanuka mu cyiciro cya kabiri, ashobora kuzamanuka ni Mukura ifite amanota 23, Kiyovu (22), Marines (19) , Gicumbi (18) na Pepiniere FC (12).

Ikipe ya Kiyovu iri mu bihe bitari byiza bishobora gutuma ijya mu cyiciro cya kabiri

Mukura (75% izaguma mu cyiciro cya mbere)

Urebye muri aya makipe ane ya nyuma, Mukura VS ni yo ifite amahirwe menshi yo kuguma mu cyiciro cya mbere. Iyi kipe izakira imikino 5 mu munani isigaje kandi, yamaze gukina n’amakipe atatu ari muri ane ya mbere.

Nta kibazo cy’amafaranga ifite ku buryo abakinnyi bashobora gutegurwa mu bushobozi bushoboka hakanakoreshwa ingufu zose kugira ngo itamanuka.

Gicumbi FC (70% izaguma mu cyiciro cya mbere)

Urebye kuri aya makipe ane, Gicumbi FC ni yo ifite umuvuduko udasanzwe kuva imikino yo kwishyura yatangira ubwo yazanaga Okoko, inararibonye mu kugarura no kuzahura amakipe agiye kumanuka (nk’uko yabikoreye Mukura, Amagaju na La Jeunesse) .

Gicumbi FC bijyanye n’imikino isigaranye myinshi izakinira mu rugo, ku rugero rwa 70% izaguma mu cyiciro cya mbere nyuma yo kubona amanota 9 mu mikino 7 ku makipe akomeye.

Kiyovu (50% izaguma mu cyiciro cya mbere)

Iyi kipe yatangiye kugaragaza imbaraga nke z’ubushobozi bw’amafaranga aho yandikiye FERWAFA ko yayiha amafaranga yo kuyitunga bikaniyongeraho gukinisha abana bataragira ubunararibonye buhagije ku buryo idacunze neza yajya mu cyiciro cya kabiri.

Undi muzigo ukomereye Kiyovu ni uko itarahura n’amakipe ane ya mbere harimo APR FC, Rayon Sports, Police FC na AS Kigali.

Marines FC (45% izaguma mu cyiciro cya mbere)

Nyuma y’igihe kinini, Marines FC ishobora kujya mu cyiciro cya kabiri. Amahirwe ya Marines FC yabaye nk’ayoyoka ubwo yatsindwaga na Gicumbi FC mu mpera z’icyumweru gishize. Iyi kipe ishobora no gutsindwa na Mukura mu mukino uzakurikiraho kuri Sitade Huye kuko Ivan Minnaert utoza iyi kipe azi neza ko atsinzwe ashobora guhita asezerwa.

Marines FC, uyu mwaka yahuye n’ibizazane ndetse bigaragara ko igenda ry’uwari umuyobozi mukuru Col Bahizi ryateje icyuho. Mu imikino 5 mu 8 iyi kipe isigaje izayikinira hanze.

Pepiniere (15% izaguma mu cyiciro cya mbere)
Amahirwe yo kuguma mu cyiciro cya mbere arabarirwa ku myanya y’intoki. Iyi kipe yigeze gusezera, yingingirwa kugaruka muri shampiyona, isoza imikino ibanza inganyije imikino ine.

Imikino isigaye kuri aya makipe

Mukura isigaje Marines, Rayon Sports, Bugesera, Amagaju FC, Gicumbi FC, Sunrise FC, Musanze FC na Kirehe FC.

Gicumbi FC isigaje Rayon Sports, Bugesera FC, Amagaju FC, Sunrise FC, Mukura, Musanze FC , Kirehe FC na Pepiniere.

Kiyovu isigaje Etincelles, APR FC, Sunrise FC, Police FC, Espoir FC, AS Kigali, Marines na Rayon Sports.

Marines FC isigaje Mukura, Musanze FC, Kirehe FC, Pepiniere FC, Etincelles FC, APR FC, Kiyovu na Police FC.

Pepiniere FC izakina na Police FC, Espoir FC, AS Kigali, Marines FC, Rayon Sports, Bugesera FC, Amagaju FC na Gicumbi FC.

Tanga igitekerezo na Facebook

Tanga igitekerezo