Katauti ntaramenya niba azaguma muri Espoir FC

Yanditswe na Rwanda Football ku wa 11.06.2015 saa 11:27 | Yasuwe : 1,396

Uwahoze ari  myugariro  w’ikipe  y’igihugu  Amavubi, Ndikumana Hamad Katauti,  avuga ko ataramenya neza  niba azaguma muri Espoir FC ,  nyuma yo kurangiza amasezerano  y’umwaka yari yasinyanye n’iyi kipe.

Katauti w’imyaka 37 y’amavuko, yari yageze muri Espoir FC  taliki 25 Kanama 2014,  avuye  muri Vitalo FC yo  mu Burundi,  nyuma  yo  kwigaragaza  mu mikino ya CECAFA Kagame Cup 2015  yabereye mu Rwanda.

Ageze muri Espoir FC yahuye n’ibibazo  by’ubwenegihugu aho yaje kugirwa umunyamahanga ukina muri shampiyona  y’u Rwanda, atangira  inzira zo  gusaba  kurenganurwa  kugeza  ubu. Ibi byatumye  asiba  imwe  mikino ibanza ya shampiyona. Uyu mugabo yabanje kwanga gukina nk’umunyamahanga, cyane  ko n’umubare w’abanyamahanga muri Espoir FC wari  umaze kwiyongera, ariko  birangiye abyemeye. Mu minsi ishize yandikiye   umukuru w’igihugu, Paul Kagame  amusaba  kurenganurwa agasubizwa ubwenegihugu  bwe.

Mu  mikino  mike yabashije gukina muri shampiyona,  Katauti  wari  unamaze  igihe adakoza ikirenge cye kuri ruhago,  yaje kugorwa no  kwitwara neza,  aha bamwe bamushinja  bimwe mu bitego Espoir FC yatsinzwe birimo ibitego  2 muri 5 batsinzwe  n’Amagaju FC mu  mukino ibanza  wa shampiyona,  kuri sitade yabo i Rusizi.

Nyuma y’uko shampiyona irangiye, byakomeje kwibazwa  niba azaguma muri Espoir FC cyangwa se niba azashaka ahandi  yerekeza.  Katauti yatangaje ko  ari icyemezo  gisaba ubushishozi gusa ariko  agitegereje  icyo  ubuyobozi bwa Espoir FC buzakora.

Katauti yagize ati “Sindabimenya nanjye ndacyategereje  niba bazampa amasezerano  cyangwa niba nzabona ahandi,  ntegereje ibyo bazambwira. Gusa  mu mutima wanjye  ndatekereza byinshi  ariko bizaterwa n’ibyo bazambwira”.

katauti-2

Katauti wari  mu mukino wahuje abahoze bakinira ikipe y’igihugu  Amavubi mu mpera z’icyumweru gishize, mu mvugo  asa n’utarafata  kugeza  n’ubu , icyemezo  cyo gusezera  umupira, agashimangira  ko azakomeza  imyitozo muri Espoir FC .

Ubuyobozi bwa Espoir FC  butangaza  ko  butaricara  ngo bwige  ku bakinnyi barangiza amasezerano  barimo n’uyu Katauti, ariko  mu mpera z’ukwezi  gutaha hazakorwa inama izabyigaho. Katauti  aheruka mu Mavubi  muri 2005,  ubwo  yashinjwe  gufata ruswa no kwitsindisha  mu  mukino  wahuje u Rwanda na Angola mu gushaka itike  y’igikombe cy’isi  cyabereye  mu  Budage muri 2006,  ibi  ariko  ntibikuraho ko yari umwe  mu bakiniye Amavubi  mu  mikino y’igikombe cy’Afurika cyabereye  muri Tuniziya muri 2004.

Mu makipe yakiniye harimo Rayon Sports, Andelecht, Gent Turnhout zo  mu Bubiligi na POP Kinyras Peyias FC, Nea Salamina, Anorthosis Famagusta FC, AEL Limassol zo  muri Chypre  kuva  muri 2000 kugeza muri 2011.

Kuva 2011 kugeza 2014 ,  Katauti yagize uburwayi  bwatumye ahagarika  gukina ,  gusa yongera kugaruka mu mikino  ya CECAFA  2014 yabereye i Kigali akinira Vitalo  FC ari nayo  yatumye asinyira Espoir FC .

 

Tanga igitekerezo na Facebook

Tanga igitekerezo