Kagere Meddie arasaba ko yarenganurwa

Yanditswe na Admin ku wa 24.06.2015 saa 01:32 | Yasuwe : 1,127

Meddie Kagere ukomeje kwitwara neza mu gihugu cya Kenya kubera ibitego akomeje gutsindira ikipe ya Gor Mahia ntabwo yishimye kubera ukuntu adahamagarwa mu ikipe y’ igihugu Amavubi ngo atange umusanzu we mu ikipe nk’ abandi bose.

Kagere ukomeje kwitwara neza muri Gor Mahia, benshi muri iki gihugu bemeza ko umupira ari gukina watuma umutoza wese w’ ikipe  y’ igihugu muri Africa yakwifuza kumuhamagara.

Kagere  aheruka gukinira u Rwanda  ubwo Amavubi yatsindaga igihugu cya Congo Brazzaville mu mukino wo kwishyura wabereye i Kigali mu gushaka itike y’ imikino ya nyuma y’ igikombe cy’ Africa 2015 ubwo u Rwanda rwatsindaga Congo Brazzaville kuri penaliti nyuma yo kwishyura ibitego 2-0 .

Amavubi yari yatsinze mu mukino ubanza nyamara akaza gusezererwa na CAF kubera gukinisha umukinnyi Daddy Birori wakoreshaga ibyangombwa bibiri bitandukanye.

Kuva ubwo itegeko ryahise rishyirwaho mu Rwanda ryo kwirukana umukinnyi wese w’ umunyamahanga wahamwaga n’ icyaha cyo guhabwa ubwenegihugu mu buryo butanyuze mu mucyo maze Kagere nawe abigenderamo kimwe n’abandi benshi bataragaruka mu Mavubi aho benshi basabwe kongera gusaba ubwenegihugu nyamara bakabitera ishoti.

Umutoza w’ Amavubi Johnny McKinstry yavuze ko nta burenganzira afite bwo guhamagara uyu rutahizamu  Meddie Kagere umaze gutsindira Gor Mahia ibitego 9 muri shampiyona ya Kenya.

kagere                  Meddie “Lwanda Magere” Kagere wambaye nimero 5 ntabwo yishimiye kubura mu ikipe y’ igihugu Amavubi

Yagize ati : “Nta nubwo dutekereza kuri Meddie Kagere kubera ko tutemerewe kumuhamagara, ntabwo yemerewe kudukinira kubera ibyabaye umwaka ushize, aho byanageze no kubandi bakinnyi, gusa ni umukinnyi mwiza.Kumugira ninko kugira Wayne Rooney mu ikipe yawe, gusa ntabwo tuzamukoresha kuzageza igihe ikibazo cye cyo kubona ubwenegihugu gikemukiye, ibi nibizaramuka bihindutse, nzamukinisha kubera ko ni umukinnyi mwiza kandi nibo dukeneye”.McKinstry abwira itangazamakuru ubwo Amavubi yatsindaga Tanzania 2-0 mu mukino wo kwibuka.

Meddie Kagere amaze kumva ibi byose nawe yagize icyo avuga dore ko atumva impamvu yashyirwa ku ruhande bene aka kageni.Yagize ati : “Inzozi z’ umukinnyi uwo ariwe wese ni ugukinira ikipe y’ igihugu, gusa kuri njyewe nyuma y’ ibyabaye umwaka ushize ntabwo nongeye gukinira ikipe y’ igihugu Amavubi. Ni agahinda kubona benshi mu nshuti zanjye dukinana bajya gukinira ibihugu byabo, nyamara njyewe wagiriye ibihe byiza muri Gor Mahia ngasigara, nkaba nifuza ko ibi byazahinduka kuko byazanshimisha cyane”, Meddie Kagere atangariza Soka25east.

Meddie  Kagere ubu ukunzwe cyane n’ abafana ba Gor Mahia aho bemeza ko ariwe mukinnyi bari bakeneye, amaze gutsinda ibitego 9 muri uyu mwaka w’ imikino muri Kenya Premier League aho ikipe ye itaratsindwa na rimwe mu mikino 15 imaze gukina aho yatsinze imikino 12 inganya 3 ikaba ifite amanota 39 iyoboye urutonde aho ikurikiwe na Sofapaka n’ amanota 27.

Amavubi ari kwitegura imikino yo gushaka itike y’ imikino ya nyuma y’ igikombe cya Africa cya 2017 ndetse n’ igikombe cy’ isi cya 2018 aho ari kumwe na Mauritius, Ghana ndetse na Mozambique aho umukino wambere  u Rwanda rwatsinze 1-0 Mozambique i Maputo ku cyumweru.

Kagere w’ imyaka 28 wavukiye mu gihugu cya Uganda amaze guhamagarwa mu ikipe y’ igihugu inshuro 26 akaba ndetse yaranyuze mu makipe ya Kiyovu S.C , Police FC, Rayon Sports, Mukura, Atraco, ayo muri Uganda nka Mbale Heroes na Masaka LC muri Tunisia Esperance Sportive de Zarzis, TF Kirana yo muri Albania ndetse na Gor Mahia yo muri Kenya akinira kugeza uyu munsi.

Tanga igitekerezo na Facebook

Tanga igitekerezo