Jeannot Witakenge yiteguye gusaba akazi muri Rayon Sports

Yanditswe na Admin ku wa 28.09.2014 saa 19:32 | Yasuwe : 1,411

Jeannot Witakenge umwe mu bakinnyi b’imena bakinnye hagati mu ikipe ya Rayon Sports, atangaza ko yahita asaba akazi ko gutoza iyi kipe mu gihe yaba isubije ku isoko umwanya w’umutoza nyuma y’igenda rya Jean Francois Losciuto.

Jeannot Witakenge ubu ni umutoza wungirije muri Saint Eloi Lupopo muri Repubulika iharanira Demokarasi ya Congo, akaba avuga ko yiteguye gusaba akazi muri Rayon Sports, ngo ibyiza yayigejejeho ayikinira akarushaho mu gihe yaba ari umutoza wa yo.

jeannotwitakenga

Mu kiganiro yagiranye n’Umuryango.rw ducyesha iyi nkuru , Jeannot Witakenge yagize ati : “Nahoze mbibona ko umutoza wa Rayon Sports yagiye muri Burkina Faso. Rayon Sports ni ikipe nagiriyemo ibihe byiza, nibaza ko nanarushaho mu gihe naba umutoza wa yo. Ngiye gufata iyi minsi ibiri ntegure dosiye yanjye, niba umwanya w’umutoza bawushyize ku isoko nzahita nsaba akazi.”

Abajijwe niba yashobora guhangana n’igitutu cy’abafana ba Rayon Sports, Jeannot yagize ati : “Lupopo ifite abafana benshi banashyira igitutu ku batoza n’abakinnyi kurusha aba Rayon Sports.”

Jeannot Witakenge wakiniye Rayon Sports kuva mu mwaka w’1990 ubwo Raul Shungu yatangiraga kuyitoza, ngo uburambe amaze kubona muri shampiyona ya RDC kuva yatangira kuyitozamo mu mwaka w’2009 ubwo yari amaze kubona impamyabushobozi yo ku rwego rwa C muri CAF, ngo bizamufasha kugeza ikipe yambara ubururu n’umweru ku bikombe birimo n’ibyo iheruka cyera.

jeannotwitakenga1

Jeannot Witakenge ubu ni umutoza wungirije muri Lupopo FC 

Gusa kugeza ubu nta cyo ubuyobozi bwa Rayon Sports buratangaza ku kuba bwasubiza uwo mwanya ku isoko ngo upiganirwe, dore ko bashobora kuba bataranamenya by’ukuri amakuru y’igenda rya Jean Francois Losciuto.

Amakuru avuga ko umutoza Jean Francois Lusciuto yasabye imishahara ye yose avuga ko afite ikibazo cyihutirwa agomba gukemura mu Bubiligi, avuga ko azagenda kuwa kane tariki ya 25 Nzeri akagaruka kuwa gatandatu tariki ya 27 Nzeri.

Gusa ngo yahagurutse i Nyanza mu gitondo cyo kuwa mbere tariki ya 22 Nzeri, yerekeza i Kigali aho yari aherekeje umukobwa w’inshuti ye benda no kurushingana, uwo mukobwa akaba akomoka muri Togo.

Benshi bemeza ko iyo mishahara y’amezi 2 yishyuwe, ariyo yabaye itike isubiza uwo mukobwa muri Togo, na we agahita yerekeza muri Burkina Faso mu ikipe ye nshya ya Asfa Yenenga..

Jeannot Witakenge yakiniye Rayon Sports kuva mu mwaka w’1990, ayivamo mu mwaka w’2002 ubwo yerekezaga muri APR FC akayivamo mu mwaka w’2003, agahita yisubirira mu makipe atandukanye yo muri Congo Kinshasa.

Tanga igitekerezo na Facebook

Tanga igitekerezo