Jamal na Muganza bafashije amakipe yabo kuguma ku isonga

Yanditswe na Admin ku wa 09.11.2014 saa 10:09 | Yasuwe : 942

Kuri uyu wa gatandatu tariki ya 8 Ugushyingo 2014 shampiyona y’icyiciro cya mbere mu mupira w’amaguru mu Rwanda yari yakomeje ku munsi wayo wa karindwi

Imikino yari itegerejwe niy’amakipe abiri ya mbere ayoboye urutonde rwa shampiyona yagombaga gukina.Rayon Sports ibifashijwemo na Rutahizamu Isaac Muganza wayitsindiye ibitego byombi yavanye amanota atatu i Gicumbi igumana umwanya wayo wa kabiri naho mukeba wayo  APR FC nawe abifashijwemo na  Mwiseneza Jamal na Maxime Sekamana yatsinze Espoir nayo 2-0.

Ikipe ya Espoir yagaragaje ko itishimiye imipangire ya gahunda ya shampiyona kuko yaje i Kigali gukina n’amakipe akomeye ayoboye urutonde mu gihe kitarenze iminsi itatu igatsindwa iyo mikino yose.

Rayon Sports itari ifite abakinnyi babiri babanzamo  Nizigiyimana Kharim Makenzi ufite amakarita abiri na Ndayisenga Fuadi kapiteniwavunitse mu mukino wa Espoir, yagaragaje imbaraga nyinshi n’ishyaka ryinshi cyane  n’ubwo itorohewe n’igice cya kabiri cy’uyu mukino, kubera kotswa igitutu na Gicumbi FC.

Umukino watangiye ubona amakipe yombi yakaniranye bikabije cyane cyane Gicumbi yakiniraga hagati ikabuza ba rutahizamu ba Rayon Sports kubona imipira.

jamalaprespoi1415

Ibi byaterwaga ahanini n’abakinnyi ba Gicumbi bavuye muri Rayon Sports Rucogoza Aimable Mambo na Uwingabire Olivier bari biziritse kuri ba rutahizamu ba Rayon Peter Otema na Isaac Muganza.

Nubwo Gikundiro yaburaga Kizigenza Makenzi na kapiteni Fuadi ntibyayibujije gukina umukino mwiza cyane cyane umusore Isaac Muganza abakunzi ba Rayon Sports bari batangiye kwibaza igihe azigaragariza nyuma yo guhusha ibitego byinshi mu mikino itandukanye.Igice cya mbere cy’umukino cyarangiye ari 0-0

Byaje rero kugaragara kuri uyu munsi wa karindwi wa shampiyona ubwo uyu musore ukiri muto waturutse muri APR FC yaje gutsinda ibitego bibiri bikurikiranye ku munota wa 53 na 55.Ibi byahaye ingufu Rayon Sports yokeje igitutu Gicumbi FC kugeza ubwo umukino warangiraga bikiri 2-0.

Mu yindi mikino yabaye kuri uyu munsi  APR FC yatsinze Espoir FC kuri Sitade y’I Nyamirambo ibitego 2-0, ibitego bya Sekamana Maxime wahawe umupira na Djamal Mwiseneza, nyuma uyu mukinnyi wavuye muri Rayon aza gutsinda igitego cya kabiri cya APR FC, Kiyovu Sports  yihereranye Etincelles FC iyitsinda igitego 1-0, cyatsinzwe na Baby Miamy Mbakiye, wahise anayobora ba rutahizamu bamaze gutsinda ibitego byinshi n’ ibitego 4.

Dore uko imikino yagenze :

APR FC 2-0 Espoir

Sunrise 0-0 Musanze

Gicumbi FC 0-2 Rayon Sports

Kiyovu Sports 1-0 Etincelles

Ku cyumweru  hateganyijwe imikino itatu:

AS Kigali vs Isonga (Regional)

Marines vs. Amagaju (Umuganda)

Police vs Mukura (Kicukiro)

Kugeza ubu APR FC ikomeje kuyobora urutonde rwa shampiyona n’amanota 17, aho imaze gutsinda imikino 5 ikanganya 2, ikaba itaratsindwa umukino n’umwe, mu gihe ikurikiwe na Rayon Sports FC ifite amanota 16, aho imaze gutsinda imikino 5, igatsindwa 1, ikanganya 1.

Tanga igitekerezo na Facebook

Tanga igitekerezo