Iyi ntsinzi ni intangiriro nziza – McKinstry

Yanditswe na Admin ku wa 16.06.2015 saa 20:27 | Yasuwe : 996

Ikipe y’iguhugu y’u Rwanda Amavubi yasesekaye i Kigali mu rukerera rwo kuri uyu wa kabiri tariki 16/06/2015 ivuye i Maputo mu gihugu cya Mozambique.

Ikipe y’igihugu y’u Rwanda Amavubi yabashije kwegukana amanota atatu imbere ya Os Mambas ya Mozambique iyitsinze igitego 1-0 mu mukino ubanza w’amajonjora y’igikombe cya Afurika cya 2017 kizabera muri Gabon.

Amavubi y’u Rwanda yabonye igitego hakiri kare ku mupira wari uzamukanywe na Haruna Niyonzima, ugaterwa na Jacques Tuyisenge ku ruhande rw’iburyo maze Sugira Ernest agakozaho umutwe, umunyezamu Ricardo Campos ntiyabashije gukurikira umupira wahise uruhukira mu rushundura ku munota wa 3 w’umukino gusa.

Ubwo bari basesekaye ku kibuga mpuzamahanga cy’indege i Kanombe, Perezida wa Ferwafa Bwana Nzamwita Vincent De Gaulle yatangarije itangazamakuru ko biteguye gutanga buri kimwe cyose kugirango Amavubi yitware neza.

“Twabyakiriye neza nk’abanyarwanda, ni intsinzi, ni amanota atatu, ariko ntitwavuga ko tugeze aho dushaka.Urugendo ruracyari rurerure nk’umutoza nanjye twabivuganye n’abakinnyi.Bakinnye n’ikipe ikomeye, ifite ubunararibonye n’abakinnyi bakina hanze, ariko kubera uko bitwaye ni byiza ariko icyo twababwira ni uko bakwibagirwa iyo ntsinzi bagatekereza imikino iri imbere nayo ntiyoroshye. Natwe rero mu ruhande rwacu tukabaha ibikenewe kugirango bategura iyo mikino isigaye.”

Vincent De Gaulle kandi yabajijwe ku ntego y’ikipe y’igihugu muri iyi mikino, niba Amavubi ashaka koko kugera mu gikombe cya Afurika cyangwa bategura ikipe ya CHAN izabera mu Rwanda mu mwaka utaha maze agira ati :

“Buri wese, yaba uwatwaye iri rushanwa mu myaka ishize, yaba uri hasi yacu, twese turahatanira kujyayo, ariko hazajyayo bake, abandi basigare.Buri kipe iritegura, na Mozambique yiteguye kudutsinda, ariko turayitsinda. Turi mu bihugu bitatu byatsindiye hanze.Intego ni ukugera kure hashoboka. Kure hashoboka ni ukujya muri Gabon. Ejo bundi twavuyemo mu buryo budasobanutse ariko byose twarabihanaguye.Byose birashoboka.Abanyarwabda badacika intege. Ikipe yabo iracyari abana bato, ntabwo bazagira icyo bakora badashyigikiwe.Twabonye urugero rwa Mozambique, stade yari yuzuye, wabonaga ko na public yo ubwayo yagutsinda.”

?????????????????????????????????????????????????????????????????????????????????????????????????????????????????????????????????????????????????????????????????????????????????????????????

Abajijwe ku myenda mishya y’uruganda AMS ikipe y’igihugu y’u Rwanda yari yambaye bwa mbere , De Gaulle yagize : “Ni imyenda myiza. Ni imyambaro myinshi, hari n’indi mutabonye , bazambara mu mikino itaha.Turashimira umuterankunga wacu, uruganda rwa AMS, turigukoranga mu gihe cy’amezi atandatu ku buntu. Ni ukwamamaza bari gukora. Amezi atandatu nashira tugashima ibikoresho byabo, tuzakomezanya.Twashishikariza abanyarwanda gukoresha komande bakajya nabo bambara nk’ikipe yabo, twaratunguwe i Maputo kuko stade yose yari yambaye umutuku keretse abanyarwanda bake bari bambaye umuhondo.”

Ku mutoza w’Amavubi Johnny McKinstry yatangaje ko umukino wo muri Mozambique utari woroshye na gato.

Yagize ati : “Ni umukino wari ukomeye cyane.Twakinnye n’ikipe ifite ishyaka, yifuza gutsinda. Ni ikipe buri umwe wese yabonaga ifite guhuza neza, gusa twakinnye neza, abakinnyi bakoze akazi kabo neza.Twabonye amahirwe nk’abiri arimo aya Iranzi, Mukunzi yewe na Sugira. Twari tuzi ko tugiye gukina n’ikipe itoroshye ya Mozambique, na twe hari aho duhagaze, twababwiye guhagarara neza , bakagerageza kumvikana, kandi barabikoze.Kuri njye Ghana ni ikipe ya mbere nziza muri Afurika, ni akazi katoroshye kadutegereje. Ni itsinda rikomeye ariko dufite amahirwe.Nyuma ya Mozambique tugiye kwitegura Ghana”

“Ku babashije gukurikirana umukino ku mateleviziyo mu cyumweru gishize, babonye ko abakinnyi bakoze ibyo bashoboye, baritanze bishoboka, tugiye kwitegura neza kandi tuzitwara neza kuko ntawaduhaga amahirwe. Birumvikana, amahirwe yacu ni uko 95% by’ikipe turi gukoresha muri AFCON ni nayo tuzakoresha muri CHAN. Uretse Abouba na Haruna, abandi bakinnnyi 16 twajyanye mu mpera z’icyumweru gishize, bakina mu Rwanda.”

“Icyizere cyo kwitwara neza muri CHAN ndagifite kandi ndashaka kugera mu mikino ya kimwe cya kabiri. Buri wese iyo ageze muri icyi cyiciro aba afite amahirwe yo kwegukana irushanwa , ntabwo navuga ko tuzaryegukana kandi mfite icyizere cy’uko tuzanakomeza mu gikombe cy’Afurika.”

Kuri myugariro w’u Rwanda, Bayisenge Emery yavuze ko bashimishijwe cyane no gutsinda Mozambique kuko yari intsinzi bari bakeneye.Abajijwe ku ishyaka ryaranze ikipe y’ighugu mu mukino w’i Maputo Emery yageze, ati :“Natwe twari dufite inyota, ntabwo navuga ngo ni ibindi bintu twaje dufite mu mitwe yacu, twari dufite ko natwe uriya mukino tugomba kuwutsinda.Ni icyizere, twatsindiye hanze, kuki tutatsindira hano mu Rwanda (bakina na Ghana). Twe , turumva ko byose ari ugushyira hamwe, kandi tugakora cyane, tuzabigeraho.”

Emery yakomeje atangaza ko bafite ubushobozi bwo kongera kujyana u Rwanda mu gikombe cya Afurika nyuma y’imyaka 11 ruvuye muri Tuniziya kuko umukino ubanza wabahaye icyerekezo kuko bagiye gukora cyane bashaka gukora amateka nk’ayo bakuru babo bakoze.

Abajijwe ku mikinire ye na Usengimana Faustin usanzwe ukinira Rayon Sports bafatanyije mu mutima wa ba myugariro mu gihe Nshutinamagara Ismael “Kodo” bakunda gukinana muri APR FC yasigaye kubera imvune, Emery akaba yavuze ko we na Faustin bakinannye igihe kirekire kandi bamenyeranye, kimwe n’uko ari inshuti no hanze y’ikibuga.


Source : Ruhagoyacu

Tanga igitekerezo na Facebook

Tanga igitekerezo