Isaac Muganza wakiniraga Rayon Sports yagiye muri Polisi FC

Isaac Muganza wakiniraga Rayon sports fc muri ba rutahizamu, yamaze gusinya amasezerano y’imyaka ibiri mu ikipe ya Polisi Fc, ndetse n’impanga ye Isaie Songa ashobora kumusangayo kuko ibiganiro n’ubuyobozi bwa Polisi bigeze kure.

Mayira Jean de Dieu, Umunyamabanga Mukuru w’ikipe ya Polisi akaba n’umuvugizi wayo , yemeje aya makuru y’uko bamaze kugura Muganza bamukuye muri Rayon sports, ndetse hari n’abandi bakinnyi baguze bashya.

Mayira yagize ati « Isaac twamusinyishije imyaka ibiri ndetse ubu ni umukinnyi wacu, impanga ye Songa Isaie nawe turi kuvugana ndetse ibiganiro bigeze kure ashobora kudusinyira uyu munsi cyangwa ejo bundi, abo bose kandi mbere yo kubagura twavuganye n’umuyobozi wa SEC Munyandamutsa Augustin kugira ngo abitwemerere kuko SEC ariyo kipe yabareze bakiri bato. »

 isaieisaac
Mayira avuga ko usibye Isaac Muganza baguze, hari n’abandi bakinnyi bakuye mu Isonga barimo Neza Anderson na Dani Usengimana kandi nabo bamaze kubasinyira, ariko avuga ko umukinnyi witwa Muhire Kevin abenshi bazi nka Rooney wahoze akinira Isonga we batabashije kumusinyisha kuko Rayon sport yabaciye mu rihumye igasinyisha uyu musore w’imyaka 17.

Niyomusabye Aimé Emmanuel  umuvugizi w’ikipe ya Rayon sports, yemeje aya makuru y’uko Isaac Muganza atakiri umukinnyi wabo ndetse yerekeje muri Polisi.

Niyomusabye ahakana kandi amakuru avuga ko Usengimana Faustin yamaze gusinyira APR Fc, ahubwo akemeza ko uyu musore bakiri mu biganiro ndetse ashobora kongera amasezerano muri Rayon sports vuba.

Isaac Muganza aje yiyongera ku bakinnyi Rayon sports yatakaje barimo Bizimana Djihad werekeje muri APR Fc, Hategekimana Aphrodice Kanombe na Fwadi Ndayisenga berekeje muri Sofapaka muri Kenya.

Tanga igitekerezo na Facebook

Tanga igitekerezo