INEOS igiye gushinga ishuri ry’umupira w’amaguru mu Rwanda

Yanditswe na Rwanda Football ku wa 24.05.2019 saa 00:14

Ishyirahamwe ry’umupira w’amaguru mu Rwanda “FERWAFA” ryasinye amasezerano y’ubufatanye na kampani yo mu Bwongereza icuruza ibinyabutabire “Chemicals Products” yitwa INEOS aho igiye gushinga ishuri ry’umupira w’amaguru mu Rwanda.

Aya masezerano y’ubufatanye yasinywe tariki 22 Gicurasi 2019 hagati ya Perezida wa FERWAFA, Sekamana Jean Damascene n’umuyobozi ushinzwe ibikorwa wa INEOS Football SA, David Thompson.

Nyuma yo gusinya aya masezerano, Perezida wa FERWAFA, Sekamana avuga ko bishimiye ubu bufatanye bagiye kugirana na INEOS Football SA kuko bizeye ko bigiye kuba intangiriro nziza y’iterambere ry’umupira w’amaguru mu Rwanda. Ati : “ Turashimira INEOS kuba baremeye kuza gukorana natwe.”

David Thompson, umuyobozi wa INEOS Football SA yatangaje ko na bo bishimiye gufatanya na FERWAFA kandi ko biteguye gushinga ishuri ry’umupira w’amaguru mu Rwanda.

Umuyobozi mukuru akaba ari na we washinze INEOS, Jim Ratcliffe avuga ko intego y’iri shuri ry’umupira w’amaguru ari uguha abana bafite impano amahirwe yo kuzaba abakinnyi bakomeye ku Isi.

Perezida wa FERWAFA, Sekamana Jean Damascene (ibumoso) n’umuyobozi ushinzwe ibikorwa wa INEOS Football SA, David Thompson basinya amasezerano

Kuri ubu FERWAFA ndetse na Minisiteri y’Umuco na Siporo “MINISPOC” bari mu biganiro byo gushaka ahantu hazahabwa INEOS kugira ngo izatangire kubaka iri shuri mu minsi iri imbere.

Iri shuri nirimara kubakwa, FERWAFA ni iyo izaba ifite inshingano zo kuzashaka abatoza bazafasha gushaka abana bafite impano.

INEOS Football SA ni yo ifite ishuri ry’umupira w’amaguru rya Team Vaud academy riri i Lausanne ndetse n’ikipe ya FC Lausanne Sport mu Busuwisi bityo rero bazajya bakorana na FERWAFA mu bijyanye no kubungura ubumenyi mu mitoreze n’ibindi.

Igishushanyombonera cy’ishuri ry’umupira w’amaguru rizubakwa mu Rwanda

Ishyirahamwe ry’umupira w’amaguru ku Isi “FIFA” ndetse n’impuzamashyirahamwe y’umupira w’amaguru muri Afurika “CAF” bagaragaje ko bashyigikiye umushinga wa INEOS Football SA basaba ko byakomeza mu bihugu by’Afurika aho bagomba kugirana amasezerano n’amashyirahamwe y’imikino mu bihugu bitandukanye.

INEOS ubu ikaba yaramaze kurangiza inyigo zo gushyiraho amashuri y’umupira w’amaguru mu bihugu bibiri by’Afurika ari byo Botswana na Namibia.

 

Tanga igitekerezo