Imyanzuro y’Inteko Rusange ya Ferwafa

Yanditswe na Admin ku wa 10.09.2014 saa 23:02 | Yasuwe : 756

Inteko Rusange isanzwe ya FERWAFA yateranye kuri uyu wa gatatu yitabiriwe n’abanyamuryango bose  yabereye ku cyicaro cyayo i Remera.

Mu byigiwe mu iriyi nama, harimo ibintu bigiye bitandukanye nko kwiga kuri raporo y’ibikorwa y’uyu mwaka, icyerekezo cya FERWAFA kuva 2014-18, ingengabihe ya shampiyona y’umwaka wa 2014-15 n’amafaranga azakoreshwa n’utuntu n’utundi.

Mu byagarutseho harimo uburyo umupira w’abana wazamurwa kugirango igihugu kizarusheho kugira abakinnyi beza kandi benshi mu myaka itaha.Inteko rusange yemeje ishyirwa mu bikorwa politiki yo kuzamura umupira wa maguru mu bana hashirwaho irushanwa rya U15 ku bahungu n’abakobwa.

Mu byemejwe ni uko shampiyona ya U15 itangira mu kwa mbere umwaka utaha ku bahungu n’abakobwa mu mujyi wa Kigali na Rubavu. Nyuma y ‘amezi atatu, hazaba gusuzuma uyu mushinga mbere  yuko iyi shampiyona ikinwa mu bindi bice by’igihugu.

U-17 n’abagore

Ni muri urwo rwego, amakipe y’ibihugu ya U17 n ‘abagore azahagarika kwitabira imikino nyafurika mu mwaka wa 2015 kugirango habanze hategurwe abakinyi beza kandi bakomeye bashobora kuzageza kure igihugu mu mikino nyafurika bazongera kwitabira kuva mu mwaka wa 2016.

intekorusange14

Photo : Ferwafa

Shampiyona y’abagore izatangira mu kwezi kwa mbere 2015 nayo izashyirwamo ingufu kugirango ishobore gutanga abakinnyi beza mu gihe cy’umwaka ku buryo abazazamuka bavuye muri U15 mu gihe cy’umwaka. Ibi bizafasha ikipe y’igihugu kuba ifite abakinnyi beza kandi bahagije mu myaka ibiri mu byiciro bigiye bitandukanye.

Shampiyona nkuru y’abagabo

Shampiyona nkuru y’abagabo izatangira tariki 20/09/2014 nkuko byemejwe n’Inteko Rusange. Ingengabihe yari yarakozwe hasabwe ko ikosorwa ikanonosorwa mu gihe gito gishoboka.

Amakipe azaba afite ubuzima gatozi niyo yonyine yemerewe gukina iyi shampiyona nkuko byamenyeshejwe kandi bikemeranywa n’abanyamuryango. Amakipe azaba adafite ubuzima gatozi azaterwa forfait kugeza igihe abuboneye.

Ku bakinyi bahinduriwe amazina n’ubwenegihugu bitemewe n’amategeko, inteko yasabye ko hashyirwaho komisiyo yo gukurikirana iki kibazo ku buryo mu cyumweru kimwe bazaba bashikirije ubuyobozi bwa FERWAFA icyakorwa kugirango abo bakinnyi basubizwe amazina yabo.

Iyi komisiyo iyobowe na Albert Mwanafunzi izakora iperereza ku bakinnyi bakekwaho kuba barahinduye amazina kugirango bakinire amakipe yo mu Rwanda. Iyi komisiyo izashyikiriza Komite Nyobozi raporo kuri iki kibazo mbere y’uko igifatira umwanzuro.

Ubuyobozi bwa FERWAFA buri mu biganiro na Bralirwa kugirango ishobore kuba yatera inkungu shampiyona y’icyiciro cya mbere. Mbere y’uko shampiyona itangira, hazaba hamaze kumenyekana umubare w’amafaranga Bralirwa izashora muri shampiyona y’uyu mwaka tugiye gutangira.

Impinduka muri shampiyona y’umwaka wa 2015/16

Shampiyona y’umwaka utaha wa 2015/16 byemejwe y’uko itangira tariki ya 15/08/2015 ikazarangira tariki ya 15/04/2016.

Kuva mu kwezi kwa kane kugeza mu kwa gatanu kurangira, amakipe azaruhuka hanyuma atangire pre-season mu kwezi kwa gatandatu aribwo bazakina Peace Cup mbere y’uko indi shampiyona itangira mu kwa munani.

Ibi bigamije gufasha ikipe y’igihugu kugira abakinnyi bakomeye bavuye mu marushanwa bitandukanye naho Amavubi ajya gutangira gukina imikino nyafurika cyangwa FIFA bamaze ikiruhuko kinini badakina bategereje ko shampiyona itangira, ibintu bigora abatoza b’ikipe y’igihugu gutoranya abakinnyi bashoboye kuba bageze U Rwanda kure mu ir’iyi mikino.

Ibindi bintu byigiwemo n’uko shampiyona z’icyiciro cya kabiri n’abagore zizatangira mu kwa mbere umwaka utaha, Ijabo Association yemerewe nk’umunyamuryango mushya wa FERWAFA naho La Jeunesse yemererwa gusubira muri shampiyona y’icyiciro cya kabiri.

Inkuru : Ferwafa

Tanga igitekerezo na Facebook

Tanga igitekerezo