Impamvu enye ziremereza umukino wa Rayon Sports na Mukura VS kuri uyu wa gatatu:

Uyu mukino uteganyijwe kubera kuri Stade ya Kigali i Nyamirambo ni umukino umukunzi wa Rayon Sports  aho ari hose atakwiye gusiba kuko ufite icyo uvuze gikomeye kuri aya makipe yombi afite inkomoko mu majyepfo y’u Rwanda.

Umukino ubanza warangiye amakipe yombi anganyije kimwe kuri kimwe. Igitego cyatsinzwe na Ndayishimiye Christophe ku munota wa 4’ ku ruhande rwa Mukura, mu gihe Moussa Camara yishyuye icyo gitego ku munota wa nyuma w’igice cya mbere. Muri uyu mukino w’ikirarane rero hari ibintu bine biri buwukomeze buri mufana wese awutegereranyije igishyika, ibyo bikaba ari ibi bikurikira.

Aba bahungu barongera gucakirana kuri uyu wa gatatu
  1. Ni umukino Rayon Sports iri butsinde igahita itwara igikombe cya shampiyona

Rayon sports ubu niyo iyoboye shampiyona n’amanota 64 ikaba irusha APR FC ya kabiri amanota 10. Mu gihe Rayon yatsinda rero yahita ishyiramo intera y’amanota 13 kuri APR iyikurikiye, kandi hasigaye imikino 4 gusa ya shampiyona, bivuze ko nubwo Rayon Sports yatsindwa imikino ya shampiyona yose isigaye ntacyo byaba bivuze.

Rayon Sports ikomeje kuyobora urutonde rwa shampiyona

Abakinnyi, abatoza, komite n’abafana bose bakwifuza ko batwarira igikombe kuri Mukura VS imwe muri ba mukeba mukeba b’imyaka myinshi. Nyuma y’uyu mukino Rayon Sports izakina na Pepiniere FC yamaze kumanuka mu cyiciro cya kabiri. Birumvikana rero ko uyu mukino wa Mukura ari uw’agaciro gakomeye ari nayo mpamvu abarayon bose bahamagariwe kuwitabira ari benshi. Ku rundi ruhande, Mukura VS nayo ntago yakwemera ko umukeba nka Rayon Sports abatwariraho igikombe. Bityo rero bikaba byitezwe ko Mukura VS izaza yakaniye uyu mukino.

  1. Yvan Minnaert utoza Mukura VS ubu yahoze ari umutoza wa Rayon Sports

Yvan Minnaert, umutoza wa Mukura kuri ubu, yatoje Rayon Sports imikino ibanza ya shampiyona ya 2015/2016, nyuma yuko ajya gutoza AFC Leopards yo muri Kenya. Aha naho ntiyahamaze umwaka kuko yahise agaruka mu Rwanda gutoza ikipe ya Mukura VS imikino y’igice cya kabiri cya shampiyona.

Ivan Minaert utoza Mukura yahoze muri Rayon Sports

Umutoza Yvan Minnaert aganira na kimwe mu bitangazamukuru by’imikino mu Rwanda yatangaje ko umukino na Rayon Sports nk’ikipe yavuyemo awuha agaciro cyane. Ibi yabitangaje nyuma yo kutishimira ko uyu mukino washyizwe ku wa gatatu w’iki cyumweru. Ibi byerekana ko Yvan Minnaert atakwihanganira gutsindwa n’iyi kipe yavuyemo. Ikindi kandi Massoud Djuma bazaba bahanganye yari amwungirije igihe yatozaga Rayon Sports bityo rero akaba atakwihanganira gutsindwa n’umutoza wahoze umwungirije bigatuma uyu mukino uzaba ari ishiraniro.

  1. Mukura VS ikeneye amanota atatu ayiha umutekano wo kuguma mu cyiciro cya mbere

Mukura VS nk’ikipe iri iri ku mwanya wa 9 n’amanota 32 irifuza amanota 3 yayiha umutekano bikaba ari iby’igiciro iramutse iyaboneye kuri Rayon Sports byaba ari iby’ishimo kuri yo n’abakunzi bayo, ibi ariko Masudi akaba atiteguye kubyemera kuko Rayon Sports itaba insina ngufi kuri Mukura. Iyi nayo ni impamvu ikomeye ikomeza uyu mukino w’andi mateka kuri Gikundiro.

    4. Umukino uheruka w’aya makipe wakoze amateka kubera imvuru zawugaragayemo

Indi mpamvu ikomeye iha isura idasanzwe uyu mukino, ni uburyo umukino ubanza wabereye i Huye wabayemo imvururu nyinshi zatumye umukino uhagarara iminota itari mike, izi mvururu zikaba zaratumye uyu mukino wamamara mu bitangazamakuru bitandukanye byo mu Rwanda no mu mahaga, bikaba byitezwe ko abantu b’impande zose z’igihugu no hanze bazaba bawuhanze amaso ari benshi.

Tanga igitekerezo na Facebook

Tanga igitekerezo