Imirimo yo kubaka Hoteli ya FERWAFA yongeye guhagarara

Yanditswe na Rwanda Football ku wa 08.05.2018 saa 15:25 |

Sosiyeti y’ubwubatsi iri kubaka Hotel ya FERWAFA i Remera yongeye guhagarika imirimo yayo kuko iri shyirahamwe ridafite amikoro ahagije yo gukomeza kubaka. Hategerejwe inkunga izava muri Maroc mu mpera z’uyu mwaka ngo imirimo isubukurwe.

Iyi Hotel yari yatangiye kubakwa muri Kanama 2015 byari biteganyijwe ko yari kuzura mu mpera za 2016 itwaye amafaranga asaga miliyari 4 z’amafaranga y’u Rwanda. 65% y’aya mafaranga yari inkunga y’Ishyirahamwe ry’Umupira w’Amaguru ku Isi ‘FIFA’.

Gianni Infantino uyobora FIFA atangiza imirimo y’ubwubatsi ya Hotel ya FERWAFA

Imirimo yo kuyubaka yaje guhagarikwa muri Gashyantare 2016 ntaho iragera nyuma y’uko havumbuwe ko habayemo uburiganya n’ikimenyane mu gutanga isoko kuri sosiyeti y’Ubwubatsi ya EXPERTS-CO ndetse n’imirimo yo kubaka ikaba yari yatangiye nta cyangobwa cyo kubaka nk’uko byemezwa na Minisitiri w’Umuco na Siporo, Uwacu Julienne.

Nyuma yo gukurikirana no guhana abagize uruhare mu itangwa ry’isoko byagaragaye ko amakosa yakozwe yahombeje FERWAFA miliyoni 620 (620 000 000Frw) yavanywe mu gice cya mbere cy’inkunga FIFA yari yaratanze muri iyi muri iyi mirimo.FIFA yafashe umwanzuro wo kureka gutanga ikindi gice cy’inkunga kugera imirimo igeze ku kigero cya 75% nkuko impande zombi zari zarabyumvikanye mu mushinga. Bivuga ko byasabaga FERWAFA kwishakira ingurane y’ayo bamwe mu bayiyoboraga bahombeje.

Tariki 21 Nyakanga 2017 nibwo uwayoboraga FERWAFA Nzamwita Vincent De Gaulle yagiranye amasezerano y’inkunga n’ubuyobozi bw’ishyirahamwe ry’umupira w’amaguru muri Maroc ‘(FRMF)’ buhagarariwe na Fouzi Lekjaa.

Abanya-Maroc bemereye FERWAFA kuyitera inkunga ya miliyoni USD 2,250,000m asaga miliyari 1.86Frw asanzwe ari amafaranga ahabwa abanyamuryango ba FIFA bivuga ko ay’iki gihugu cy’Abarabu bayahaye u Rwanda nk’impano.

Hoteli ya FERWAFA ngo izatwara miliyari zibarirwa muri enye

Nkuko  byatangajwe n’umuyobozi mushya wa FERWAFA Brig Gen Sekamana Jean Damascene aya masezerano yagombaga kuba yarashyizwe mu bikorwa imirimo igakomeza ariko yakomwe mu nkokora  na FIFA kubera gukeka ko ari ruswa Maroc yahaye u Rwanda ngo ruzayitore kuko iri guhatanira kuzakira igikombe cy’isi 2026.

Yagize ati : “Maroc yari yemeye gutanga amafaranga yari ifite muri FIFA ikayaduha ariko ibi bintu bisa nk’ibyahagaze kugira ngo bititwa ruswa. Icyo Maroc yasabwaga ni ukwandikira FIFA igasinya ivuga ko ibyo igenerwa bigomba kohererezwa u Rwanda bisobanuye ko ishobora kuba yarifashe ngo idateza ibibazo kuko hari n’ibindi byinshi yahagarikiwe (muri iyi minsi yo kwiyamamariza kwakira igikombe cy’isi).Na FIFA nayo yadusabye ‘rapport’ y’aho imirimo igeze kuko nabo hari ibyo bagomba kumenya ngo baduhe amafaranga akurikiye (igice cya kabiri cy’inkunga) kuko bavuga ko bazongera kuduha amafaranga ari uko tugeze kuri 75% y’imirimo kandi kugera kuri icyo kigero biradusaba kubanza kubona iyo nkunga ya Maroc. Ku bwanjye ndumva nta kizere cy’uko tuzongera gutangira gukora mbere y’uko ariya matora (y’igihugu kizakira igikombe cy’isi) arangira.”

Igihugu cya Maroc kifuza kwakira igikombe cy’isi cya 2026 kibihanganiye na Leta zunze ubumwe za America zo zifuza kucyakira gifatanyije na Mexico na Canada. Biteganyijwe ko uzakira iki gikombe cy’isi azatangarizwa mu Burusiya tariki 13 Kamena 2018. Nyuma ibiganiro by’uko abanya-Maroc bageza inkunga ku Rwanda bikabona gukomeza.

Tanga igitekerezo na Facebook

Tanga igitekerezo

Powered by Live Score & Live Score App