Imikino ya shampiyona yo kwishyura yatangiye

Yanditswe na Admin ku wa 28.01.2015 saa 20:18 | Yasuwe : 1,193

Ubwo hasubukurwaga imikino ya shampiyona amakipe ane ya mbere muri shampiyona ananiwe kubona amanota atatu yo gutangira imikino yo kwishyura.

Ikipe ya As Kigali inaniwe kwisobanura na Sunrise FC 1-1.Igitego cya Sunrise FC cyatsinzwe na Jean d’Amour Bonane naho igitego cya As Kigali gitsindwa na Ndikumana Bodo.

Nshimiyimana Eric umutoza wa As Kigali nyuma y’umukino yatangaje ko ari ubundi bunararibonye kuriwe kandi ari ukuva na kera hose. Ati ” mu mupira w’amaguru harimo imikino ibiri gutangira imikino ibanza no gutangira imikino yo kwishyura. Kariya karuhuko kaba karatumye umuntu aza agakoresha imbaraga kuri uwo mukino.

sunriseaskigali15

Niyo mpamvu ubona hari amakipe menshi yananije andi, kariya karuhuko karagenda kakabashyiramo imbaraga, zikongera zikaboneka, nyuma y’iminsi ibiri itatu bizongera bihinduke”.Nshimiyimana avuga ko yakwifuza kuba ikipe ye iri ku mwanya wa mbere, ariko hari ukundi kuri.

Ati ” APR FC itakaje amanota 3 twe dutakaje 2, ariko hari akanota kamwe tubonye dukomeze turebe, hari igihe natwe tuzagenda tubona umugisha”.

Nzunga Thierry umutoza wa Sunrise FC, atangaza ko baje gukina na As Kigali bashaka gutsinda, ariko bikaba byahindutse.Ati ” inota rimwe mu mupira w’amaguru ni ryinshi kuri twe”.Thierry atangaza ko intego yabo ari ukuguma muri shampiyona y’icyiciro cya mbere.

Mu yindi mikino, Gicumbi FC yatsinze Police FC itsindirwa na Sengayire Chadadi.Amagaju FC yatsindiwe igitego na Sayiba Mumbere Claude kiza kwishyurwa na Ndayisenga Faudi wa Rayon Sports kuri penaliti.

Kuri uyu wa kabiri Ikipe ya Etincelles Fc itsinze Isonga ku gitego 1-0 mu mukino wayo wa mbere wo kwishyura umukino wabereye  ku kibuga cya Kicukiro.

Hategekimana Bonaventure bakunze kwita Gangi niwe watsinze igitego cya Etincelles kuri Penaliti ku munota wa 18 w’igice cya mbere ku ikosa ryakorewe Yousa Bertrand mu rubuga rw’amahina ubwo Tuyisenge Hakim yamukoreraga ikosa.

etincellesisonga
Moussa Gatera umutoza wa Etincelles FC yatangaje ko bishimiye gutangira mu mikino yo kwishyura bafite amanota atatu dore ko bibatera imbaraga zo gukomeza gutsinda indi mikino izakurikiraho. Yagize ati “iyi kipe nayijemo hagati mu mikino ibanza ariko nayisanzemo ibibazo bitandukanye nko kuba abakinnyi batazi guhagarara neza mu kibuga ndetse no kutabasha guhuza umukino”.

Avuga ko nibura ubu bigenda bikosoka kuko abasha gufatanya n’abatoza bamwungirije kugira ngo barebe ko ayo makosa yose yakosoka.

Seninga Innoncent umutoza w’Isonga Fc avuga ko abakinnyi be bagerageje kwitwara uko bashoboye n’ubwo bakose ikosa mu minota ya mbere bagatsindwa igitego kuri Penaliti.

Ikipe ya Etincelles nubwo yatsinze uyu mukino iraguma ku mwanya wa 13 aho inganya amanota n’ikipe ya Musanze kuko zose zifite amanota 11 mu mikino 14 ariko ikipe ya Musanze iyirusha umwenda w’ibitego izigamye.

Isonga imaze gutsindwa imikino 10 muri uyu mwaka wa shampiyona iri ku mwanya wa 14 n’amanota ane.Undi mukino wabaye kuri Sitade ya Muhanga, Espoir yatsinze Mukura igitego 1-0.

Uko amakipe yahuye kuri uyu wa gatatu

Police FC 0-1 Gicumbi FC (Kicukiro)

Musanze FC 1-0 APR FC (Musanze)

Marines FC 2-2 Kiyovu Sports (Tam Tam)

AS Kigali 1-1 Sunrise FC (Sitade ya Kigali)

Amagaju FC 1-1Rayon Sports (Nyamagabe)

Tanga igitekerezo na Facebook

Tanga igitekerezo