Imanishimwe Emmanuel atumye Rayon Sports irega APR FC muri Ferwafa

Nyuma yo gusinyira Rayon Sports na APR FC amasezerano y’imyaka ibiri, Rayon Sports yagejeje ikirego muri FERWAFA isaba ko yarenganurwa.

Mu rukerera rwo kuri uyu wa kane tariki 14 Nyakanga 2016, nibwo inkuru n’amafoto byasohotse bigaragaza ko myugariro w’ibumoso Emmanuel Imanishimwe yongereye amasezerano y’imyaka ibiri muri Rayon Sports. Ahabwa Sheki ya miliyoni enye n’igice, muri miliyoni esheshatu bari bumvikanye.

Amasaha macye nyuma yaho, uyu musore w’imyaka 21 yasinyiye APR FC nk’uko byatangajwe n’umunyamabanga wa APR FC, Kalisa Adolphe Camarade wagize ati “Nta byinshi mvuga kuri iyi gahunda. Gusa Emmanuel ni umukinnyi wa APR FC. Ibindi, sinabuza abantu kuvuga ibyo bashaka.”

Mu gitondo cyo kuri uyu wa gatanu, Rayon Sports yatanze ikirego mu ishyirahamwe ry’umupira w’amaguru mu Rwanda (FERWAFA).Mu mpamvu eshatu Rayon Sports yashingiyeho irega APR FC, harimo ko yasinyishije umukinnyi ukiyifitiye amasezerano kuko atararangira.

Imanishimwe Emmanuel ntaramenya ikipe azakinira umwaka utaha
Imanishimwe Emmanuel ntaramenya ikipe azakinira umwaka utaha

Umunyamabanga n’umuvugizi wa Rayon Sports Gakwaya Olivier we yagize ati “Si ibintu byo guhisha, habaye amakosa akomeye muri ‘transfer’ ya Emmanuel. Icya mbere, ntabwo APR FC yari yemerewe kumusinyisha, kandi agifite amasezerano yacu. Amasezerano asanzwe dufitanye na Emmanuel azarangira mu cyumweru gitaha. Ibyo ubwabyo bizitira indi kipe yose yasinyisha Emmanuel tutabizi.”

ibaruwaray
Ibaruwa Rayon Sports yandikiye Ferwafa

Indi mpamvu Gakwaya atanga, ngo ni uko Emmanuel Imanishimwe yari yongereye amasezerano y’indi myaka ibiri ayikinira.Ati “Dufite amasezerano yadusinyiye, kandi nawe afite Sheki twamuhaye. Ibyo numvise bavuga ngo iyo Sheki ntiyari izigamiye ni ibinyoma, kuko Konti dukoresha ni imwe kandi abandi bakinnyi turimo gusinyisha bo bamaze kubona amafaranga yabo. Twafashe umwanzuro wo gutanga ikirego muri FERWAFA. Icyo twifuza kimwe ni uko twarenganurwa.”

Icyemezo Manishimwe yiyandikiye yemeza ko yakiriye amafaranga ya Rayon Sports
Icyemezo Manishimwe yiyandikiye yemeza ko yakiriye amafaranga ya Rayon Sports

Nyir’ubwite Emmanuel Imanishimwe yatangaje ko adashobora kuvugisha itangazamakuru. Gusa ngo ibye biri hafi gukemuka ukuri kukamenyekana.Uyu musore kandi ngo yari anafitanye amasezerano na FC Leopards yo muri Kenya nubwo ibyayo byari bitarasobanuka.

Uretse Rayon Sports yamaze kurega uyu mukinnyi, n’ikipe ya AFC Leopadrs yo muri Kenya itozwa na Ivan Jacky Minnaert igiye kurega uyu mukinnyi kuko mbere yo gusinyira Rayon Sports na APR FC niyo yari yabanje gusinyira imyaka ibiri nubwo bo nta mafaranga bari bamuhaye.

cheque
Sheki Imanishimwe yahawe akanasinyira ko ayifashe

Imanishimwe ashobora gufatirwa ibihano byo guhagarikwa mu gihe cy’umwaka adakina igihe Ferwafa yahamya ko yasinyiye amakipe arenze imwe ariko bishobora no kuba nk’uko byagenze muri 2014 ubwo myugariro James Tubane yasinyiraga Rayon Sports na AS Kigali icyarimwe, Ferwafa igasaba amakipe yombi kumvikana byatumye
umukinnyi yegukanwa na Rayon Sports.

Ibibazo nk’ibi byo gukinira amakipe abiri si ubwa mbere bibaye mu Rwanda, Ben Mwalala na Saido Ntibazonkiza muri 2005, basinyiye APR FC na Rayon Sports, Rayon Sports irarega birangira abakinnyi bombi batagarutse mu Rwanda; Mulenda Abedi yasinyiye ATRACO na Rayon Sports muri 2010, ahanishwa amezi umunani adakina ruhago mu Rwanda.

Tubane James yasinyiye Rayon Sports na AS Kigali muri 2014, birangira FERWAFA isabye amakipe yombi kumvikana, birangira AS Kigali ihariye Rayon Sports, yemera gusubizwa amafaranga yari yatanze kuri Tubane.

Tanga igitekerezo na Facebook

One thought on “Imanishimwe Emmanuel atumye Rayon Sports irega APR FC muri Ferwafa

  • 16/07/2016 at 19:38
    Permalink

    Har’ubwo Rayons itubabaza koko !!!

    Aho uyu musore ashobora kuba yarashyize umukono ku masezerano yemewe n’amategeko, (Contrat Nyayo), ahantu hemewe n’amategeko (siège social y’ikipe), agahabwa byose byemeranijwe n’impande zombi, bishobora kuba ari muli APR FC honyine.

    Ubundi har’udupapuro nkutwo mwagaragaje ku rubuga rwanyu, tutagira en-tête, basinyisha abakinyi saa saba n’igice z’ijoro, mu cabaret k’i Muhanga, simvuga n’utundi tw’impimbano tw’amasezerano atazwi n’umukinyi (Faux et usage de faux), chèque itazigamye…

    Icyo nasaba APR FC, n’uko yakorohereza uwo musore akajya gukina muli AC Leopards, ubundi nta musaruro mwiza yabaha, afite abanzi bangana nk’aba rayons.

    Reply

Tanga igitekerezo