Ikipe ya Salomon Nirisarike yazamutse mu cyiciro cya mbere

Ikipe ya Saint- Trond ikinwamo na myugariro w’ikipe y’igihugu y’u Rwanda Salomon Nirisarike, yaraye ibonye itike yo kuzamuka mu kiciro cya mbere cy’umupira w’amaguru mu gihugu cy’Ububiligi.

Saint-Trond yatsinze ikipe ya ASV Geel ibitego 4-1 mu mukino wa shampiyon y’icyiciro cya kabiri mu gihugu cy’Ububiligi yari igeze ku munsi wa 33, biyihesha kuyobora urutonde rwa shampiyona n’amanota 76 mu gihe habura umukino umwe ngo shampiyona irangire.

Ibitego bya Saint-Trond byatsinzwe na Rob Schoofs ku munota wa 20, Joeri Dequevy ku munota wa 29, Ben Santermans witsinze ku munota wa 34, na Hilaire Roméo Verdi Momi watsinze agashinguracumu ku munota wa 41 mu gihe igitego rukumbi cy’ikipe ya ASV Geel cyatsinzwe na Gielis Zico ku munota wa 72 w’umukino.Myugariro w’Amavubi, Salomon Nirisarike w’imyaka 20, akaba yinjiye mu kibuga asimbuye.

salomon_nirisarike

Saint-Trond ikaba izazamukana na Lommel United, ya kabiri ku rutonde rwa shampiyona y’icyiciro cya kabiri muri uyu mwaka n’amanota 70 mu gihe ikipe ya gatatu izamenyekana nyuma yo guca mu mikino ya Play-offs.

Umukino usoza shampiyona, ikipe ya Sint Truiden ikaba igomba guhangana na Lommel United ya kabiri ku itariki 25/04/2015.

 

 

Tanga igitekerezo na Facebook

Tanga igitekerezo