Ikibazo cya Songa Isaie ntikivugwaho rumwe

Yanditswe na Admin ku wa 30.07.2015 saa 04:25 | Yasuwe : 1,236

Songa Isaie wari usanzwe akinira ikipe ya AS Kigali kugeza ubu wamaze gusinya muri Polisi Fc ariko agifite amasezerano muri AS Kigali, ashobora guhagarikwa umwaka umwe muri shampiyona y’u Rwanda kubera kugira amasezerano mu makipe abiri .

Umutoza w’ikipe ya AS Kigali Eric Nshimiyimana, avuga ko nubwo Songa yasinye muri Polisi akiri umukinnyi wabo kuko yari agifitiye AS Kigali amasezerano y’umwaka umwe kuko azamo yasinye imyaka ibiri, ndetse ikibazo cye bamaze kukigeza muri FERWAFA.

Nshimiyimana avuga ko niba hari ibyo Songa atishimiye muri AS Kigali yifuza ko yakemurirwa, agomba kugaruka akabanza kuganira n’ubuyobozi bwa AS Kigali kugira ngo bikemurwe kuko akiri umukinnyi wabo ubafitiye amasezerano y’umwaka umwe.

saie-Songa

Munyandamutsa Augustin ; umuyobozi wa SEC ari nayo Songa yakiniye akiri muto akaba anamuhagarariye mu mategeko, yavuze ko Songa amasezerano yari afitanye n’ikipe ya AS Kigali yayasheshe n’ubwo ubuyobozi bwa AS Kigali butabyemera.

Munyandamutsa yagize ati « Songa sinari nzi ko yasinye imyaka ibiri muri AS Kigali kuko nari nzi ko yavuye muri APR Fc ajya muri AS Kigali atijwe, ibyo rero by’amasezerano y’imyaka ibiri yasinye muri AS Kigali ntabyo nzi ni nayo mpamvu namugiriye inama yo gusesa amasezerano agasinya muri AS Kigali, ubu ikibazo kiri muri FERWAFA ngo igikemure. »

Hakizimana Mousa, umuvugizi wa FERWAFA avuga ko ikibazo cy’uyu mukinnyi batangiye kugisuzuma bafatanyije n’impande kireba, ndetse nibasanga yarasinyiye amakipe abiri nk’uko bivugwa azahagarikwa muri shampiyona y’u Rwanda umwaka umwe nk’uko amategeko abiteganya.

Si ubwa mbere muri shampiyona y’u Rwanda umukinnyi yaba ahagaritswe kubera gusinyira amakipe abiri, kuko byigeze kuba ku mukinnyi Abed Mulenda icyo gihe wahagaritswe umwaka wose kubera gusinyira Rayon sports na Atraco.

Tanga igitekerezo na Facebook

Tanga igitekerezo