Igura n’igurisha : Faustin muri APR,Tibingana muri As Kigali, Mussa muri Rayon

Yanditswe na Rwanda Football ku wa 06.08.2015 saa 10:47 | Yasuwe : 1,668

Mu gihe mu Rwanda turi kwitegura itangira rya shampiyona 2015-2016 , amakipe akomeje kwiyubaka ari nako abakinnyi bakomeye bakomeje guhindura amakipe

Nkuko twabibabwiraga mu nkuru zashije ,bidasubirwaho Usengimana Faustin wakiniraga ikipe ya Rayon Sports nawe yamaze kwerekeza mu ikipe ya APR FC aho yamaze gusinya amasezerano y’imyaka ibiri akaba agiye gusimbura Emery Bayisenge werekeje ku mugabane w’i Burayi mu gihugu cya Autriche.

Usengimana Faustin wari umaze igihe kirekire muri Rayon Sports yahawe amasezerano y’imyaka ibiri kuri miliyoni 10 z’amanyarwanda akaba azajya ahembwa 500,000 ku kwezi.

Gusinya muri APR FC kwa Faustin Usengimana bikaba byaragiye bigarukwaho cyane bitewe nuko ari yo yamufashije kwivuza ubwo yavunikiraga ku mukino wa mbere wa shampiyona Rayon Sports yakinaga na Gicumbi muri 2013.

Faustin abaye umukinnyi wa kabiri ukomeye werekeje muri APR FC avuye muri Rayon Sports mu gihe cy’ukwezi kumwe nyuma ya Bizimana Djihad wayerekejemo ahawe miliyoni 8 z’amafaranga y’u Rwanda.Rayon Sports nayo ariko ntiyicaye ubusa kuko yahise igura myugariro wavuye muri Marines Thierry, ngo asimbure Usengimana Faustin.

Umukinnyi Tibingana Charles Mwesigye wakiniraga ikipe ya APR FC akaza kuyisezeramo mu minsi ishize yamaze guhabwa amasezerano mu ikipe ya AS Kigali aho yamaze guhabwa amasezerano y’imyaka 2 .Tibingana Charles wageze muri APR FC mu 2013 akayikinira mu mwaka umwe wa shampiyona wa 2013/14 ariko ntiyabasha kugaragara muri iyi kipe muri shampiyona ishize nyuma yo kwamburwa ubwenegihugu.

Tariki 17 z’uku kwezi ni bwo uyu mukinnyi abinyujije ku rukuta rwe rwa Facebook yemeje ko yamaze gusezerera muri APR FC ayishimira byinshi bagezeho bari kumwe.

faustintibinganamussa

Mu cyumweru gishize umutoza Eric Nshimiyimana wa As Kigali yari yatangaje ko bamaze kuganira n’uyu mukinnyi kugira ngo batangirane imyitozo nyuma yo kwemeranya kuyikinira.AS Kigali yatangiye imyitozo kuwa mbere w’icyi cyumweru ifite amaraso mashya aho yaguze abakinnyi barimo Tuyisenge Pekeake “Pekinho”, Onisme bakuye muri Sorwathe na Ndaaka Frederick wakinaga muri Kenya.

Tibingana Charles Mwesigye yageze mu ikipe ya APR FC tariki 23 Kamena 2013 nyuma yo gukina mu makipe nka Proline na Victoria University zo muri Uganda.

Uyu mukinnyi wavukiye i Mbarara muri Uganda, yakiniye Amavubi y’abatarengeje imyaka 17 mu gikombe cy’isi cy’abatarengeje imyaka 17 cyabereye muri Mexique mu 2011 nyuma y’igikombe cya Afurika cyari cyabereye mu Rwanda bagasoza ku mwanya wa kabiri batsinzwe na Burkina Faso ibitego 2-1.

Mutuyimana Moussa wahoze ari kapiteni w’ikipe ya Police FC ari mu biganiro n’ikipe ya Rayon Sports bikaba bigeze kure aho ashobora kuyisinyira akayikinira mu mwaka utaha w’imikino.Mutuyimana Moussa yamaze kwemeranya n’ikipe y’i Nyanza kuZAyikinira akaba hategerejwe ibaruwa (Release letter) imwemerera kwerekeza muri Rayon Sports.

Mu cyumweru gishize, uyu mukinnyi akaba yari yatangaje ko ari mu biganiro n’ikipe ya AS Kigali.

Moussa Mutuyimana yavuye mu Rwanda mu ntangiriro z’umwaka w’imikino 2014/15 nyuma yo kurekurwa n’ikipe ya Police FC dore ko yari yambuwe ubwenegihugu bw’u Rwanda, aho akanama kari gashinzwe kwiga ku byangombwa bya bamwe mu bakinnyi b’abanyamahanga kagaragaje ko uyu mukinnyi yitwa Kasereka Fabrice.

Mu mpera z’umwaka ushize, uyu mukinnyi yari mu bifuzwaga cyane n’ikipe ya Rayon Sports, aho yari kuzana na Sina Jerome muri iyi kipe, ariko ntibyakunda ko ayikinira, yerekeza muri Kenya nubwo yari yasinye muri Rayon Sports.

Tanga igitekerezo na Facebook

Tanga igitekerezo