Igikombe cy’Amahoro 1/8 : AS Kigali na Mukura zasezerewe

Yanditswe na Rwanda Football ku wa 18.06.2015 saa 09:39 | Yasuwe : 921

Ikipe ya AS Kigali isezerewe rugikubita muri 1/8 cy’igikombe cy’Amahoro n’ikipe y’Isonga iyitsinze kuri za penaliti  nyuma yuko amakipe yombi anganyije igitego 1-1.   

As Kigali  yahabwarwa amahirwe n’abantu benshi yo  kuzagera kure mu gikombe cy’Amahoro nyuma yo kwitwara neza muri shampiyona, ariko ntibashije kurenga umutaru kuko yatunguwe n’’Isonga izamanuka mu cyiciro cya kabiri .

Uyu mukino wabereye ku kibuga cyo ku Mumena I Nyamirambo  wari witabiriwe n’abantu batari benshi cyane, wagaragayemo kudahangana cyane mu gice cya mbere cy’umukino aho cyarangiye ari 0-0.

Ku munota wa 53 w’umukino, Sugira Ernest uhagaze neza muri iyi minsi akaba ari nawe watsinze igitego cy’u Rwanda muri Mozambique yatsindiye AS Kigali igitego cy’umutwe  ku mupira yari aherejwe neza na Mico Justin.

Ikipe y’Isonga yatangiye kotsa igitutu bikomeye ikipe ya AS Kigali ikajya ihusha n’uburyo butandukanye bwari bwabazwe muri uyu mukino. AS kigali yakinaga isa nk’icungira kuri contre attaque yabonye amahirwe nk’atatu yo kubona igitego cya kabiri  ariko ntiyayabyaza umusaruro.

isongapeacecup

Ku munota hafi wa 84 w’umukino ku mupira wari uvuye muri koruneli  yatewe neza na Muhire Kevin, umusore Seif ahita yishyura iki gitego bari batsinzwe na As Kigali. Abasore ba Eric Nshimiyimana.UmusifuzI  Mussa wari uyoboye uyu mukino   yahise yereka amakipe yombi ko hakurikiyeho za penaliti nk’uko amategeko abiteganya.

AS Kigali yinjije Penaliti 2 gusa  mu gihe Isonga yatsinze penaliti 4, ihita igera muri 1/4 cy’irangiza.Mansour, Mugisha bakunda kwita Mayor, Dany na Cyprien baziteye neza, mu gihe Kevin Muhire yayihushije. Ku ruhande rwa AS Kigali, Sugira na Hamidou bateye neza, naho Rodrigue Murengezi na Bodo barazihusha.

umutoza wa AS Kigali Eric Nshimiyimana nyuma y’umukino yagize ati :” Navuga yuko habayeho kwirara gato ku bakinnyi banjye, kuko nyuma yo gutsinda igitego cya mbere, hari amahirwe menshi yo kubona n’ikindi gitego, ariko twagiye tuyapfusha ubusa.”

Mugenzi we Seninga Innocent utoza Isonga nawe ati : ” Ndishimye cyane gusezerera ikipe nka AS Kigali, yabaye iya 2 muri shampiyona, aba bakinnyi bakoze akazi gakomeye. Ikipe yacu ntabwo ari ikipe mbi, ahubwo habayeho kutamenyerana mu mikino ibanza  kuko bwari ubwa mbere benshi bakinanye ariko mu mikino yo kwishyura twitwaye neza.Mpamya ko iyo bakinana undi mwaka twari kuba dufite ikipe nziza cyane, byanagirira akamaro ikipe y’igihugu.”

Uyu mutoza akaba yakomeje atangaza ko abakinyi benshi bamaze kubona amakipe abagura ariko abatarabona amakipe berekezamo amahirwe bafite ari ukwitwara neza mu gikombe cy’Amahoro, bifuza kuzagera kure hashoboka.

Ku cyumweru gishize, Isonga yakinnye umukino wa gicuti na Rayon Sports, batsindwa bigoranye ku bitego 4-3.

kuri Sitade ya Muhanga, Gicumbi Fc yahatsindiye Mukura VS nayo kuri penaliti 4-3 nyuma yo kunganya igitego 1-1 mu minota 90 y’umukino.

Indi mikino yabaye kuri uyu wa gatatu muri 1/8 kirangiza:

  • SC Kiyovu 4-1 Sorwathe
  • Espoir 7- Vision JN
  • Musanze 0-1 Etincelles
  • Mukura 1-1 Gicumbi (Penaliti: 3-4)

Kuwa Kane, tariki 18/06/2015

  • Police vs Sunrise (Mumena, 15h30)
  • Rayon Sport vs Sec (Kicukiro, 15h30)
  • APR vs Bugesera (Ferwafa, 15h30)

Amakipe uko azahura muri 1/4 kirangiza:

  • Espoir FC vs Isonga
  • Etincelles FC vs Rayon Sports/SEC
  • Gicumbi vs APR FC/Bugesera
  • Kiyovu vs Police FC/Sunrise FC
Tanga igitekerezo na Facebook

Tanga igitekerezo